Sake Kornelis Feitsma

Sake Kornelis Feitsma
skriuwer
persoanlike bysûnderheden
oar pseudonym	S.K. Feitsma
echte namme	Sake Kornelis Feitsma
nasjonaliteit	Nederlânsk
berne	8 septimber 1850
berteplak	Burgum (Fryslân)
stoarn	8 jannewaris 1918
stjerplak	De Haach (Súd-Hollân)
etnisiteit	Frysk
wurk
taal	Frysk, Nederlânsk
sjenre	lit. koarte ferhalen, mearkes, poëzij, non-fiksje, oersettings
perioade	Belle Époque
streaming	naturalisme
bekendste   wurk(en)	"Dêr wier ris...!": Fryske Mearkes    út 'e Folksmûle Opskreaun Ut e Modder fen e Maetskippij
jierren aktyf	1888 – 1918
offisjele webside
n.f.t.

Sake Kornelis Feitsma (Burgum, 8 septimber 1850 – De Haach, 8 jannewaris 1918) wie in Frysk ûnderwizer, dichter, oersetter, boekferkeaper en korrektor.

Libben

Hy wie de soan fan in timmerfeint. Yn Bûtenpost learde er foar skoalmaster, en nei't er syn akte helle hie, krige er in oanstelling yn Ingwierrum en letter yn Havelterberg. Yn 1882 brocht er it ta skoalhaad yn it Gelderske Voorst. Syn begearen wie Hendrika Veenstra, in skoalmastersdochter fan 'e Lemmer, mar har folk kearde in houlik tsjin. Feitsma rekke dêrop oan 'e drank, wat fan gefolgen hie dat er gauris earne ûntslach naam en op in oar plak nij wurk socht, lykas barde yn Jobbegea, Holwert, Uithuizen, Achlum en Aldhoarne. Einlings joech er it ûnderwizerskip der alhielendal oan. Hy waard breaskriuwer en sutele mei syn eigen bondeltsjes foardrachten en ferhalen, dy't er ek publisearre yn tydskriften. Tusken 1892 en 1905 wurke er as korrektor mei oan it Friesch Woordenboek. Yn 1897 troude er dochs noch mei Hendrika; se hiene doe goed fyftjin jier opinoar wachte. Efterinoar húsmannen se yn Twello, Dimter, Sutfen, Arnhim, Felp, Easterbeek, Hees en De Haach, wylst se sosjaal sjoen almar fierder efterútbuorken. Op 't lêst rekken se alhiel ta reapsein en wiene se de earmoed net mear treast; tegearre makken se op 8 jannewaris 1918 in ein oan harren libbens.

Njonken gedichten, koarte ferhalen en foardrachten, skreau Feitsma ek mearkes (lykas de samling "Der wier es", 1893); naturalistyske sketsen oer earmoed, bgl. op 'e Burgumer Heide (Ut e modder fen e maetskippij, 1893); en bibeloersettings (Evangeelje fan Markus, 1897; Joël, 1898).

Wurk

• 1888: Saun Ris Om: Grappige Teltsjes yn Onrym
• 1888: For Sprekkers en Lêzers: Nije Grappige Teltsjes yn Onrym
• 1890: It Skildbiwys, ef: Elk Lyk en Rjucht - Forhael út it Folkslibben
• 1891: Fen Earder en Letter (Samle Frysce Rimen)
• 1892: De Fryske Phonograef, fen Pas Foarbringende der yn Opnomde Sprekwirden, Siswizen en Oarspronklike Wirden út de Hjoeddeiske Omgongssprake
• 1892: Printsjes, Kleurd mei Ferwen út 'e Teikendoaze fen Fryske Sprekwirden, Sizmanearen en Nysgjirrige Wirden út 'e Hjoeddeiske Sprektale Opfandele
• 1892: Fryske Mearkes: Ut 'e Folksmûle Opskreaun, I. De Trije Riedlingen (mearkes)
• 1892: De Trye Buchelden
• 1893: "Dêr wier ris...!": Fryske Mearkes út 'e Folksmûle Opskreaun (mearkes)
• 1893: In Domenijs Hûsbisiik en Oare Grappige Foardrachten op Rym
• 1893: Ut e modder fen e maetskippij (naturalistyske earmoedsketsen)
• 1893: Fryske Mearkes: Ut 'e Folksmûle Opskreaun: De Prombeam (mearkes)
• 1897: Evangelie van Markus, vertaald in het Land-Friesch (bibeloersetting)
• 1898: Joel (bibeloersetting, mar nea útjûn)
• 1899: De ljue út 'e mounle
• 1902: De vlugge Fries: Handleiding om Zonder Onderwijzer in Korten Tijd Friesch Werkelijk te Leeren Lezen, Schrijven en Spreken
• 1906: "Raer folk!" ef: De Geast fen it Kweade
• 1907: Troud Wiveleed en Bernelot: Oarspronklik Forhael út 'e Underste Lagen (ferhalen)
• 1908: In Forskoveling: Oarspronklik Forhael út 'e Underste Lagen (ferhalen)

Moderne werútjeften

• 1991: Ut 'e Underste Lagen I & II (yn fotomeganyske print)
• 1999: Ut 'e Underste Lagen (útkommen yn 'e rige fan de Fryske Klassiken, mei in artikel fan Trinus Riemersma)

Keppeling om utens

• Sake Kornelis Feitsma by Tresoar

Boarnen, noaten en referinsjes

Boarnen, noaten en/as referinsjes:

Brouwer, J. H. en oaren, Encyclopedie van Friesland 1953, Feitsma, Sake Kornelis.