Kawennáhere Devery Jacobs

Kawennáhere Devery Jacobs
akteur
persoanlike bysûnderheden
echte namme	Kawennáhere Devery Jacobs
nasjonaliteit	Kanadeesk
berne	8 augustus 1993
berteplak	Kahnawake (Kebek)
etnisiteit	Mohâk
jierren aktyf	2007 – no
offisjele webside
Kawennáhere Devery Jacobs yn 'e IMDb

Kawennáhere Devery Jacobs, ek wol koartwei Devery Jacobs neamd (Kahnawake, 8 augustus 1993), is in Kanadeesk tillefyzje-, film- en toanielaktrise fan Yndiaansk komôf. Foar har optreden yn 'e film Rhymes for Young Ghouls (2013) waard se nominearre foar in Canadian Screen Award yn 'e kategory bêste aktrise. Yn 2023 en 2024 waard se twaris nominearre foar de Amerikaanske Critics' Choice Television Award foar bêste aktrise yn in komeedzjesearje.

Libben en karriêre

Jonkheid en komôf

Jacobs waard yn 1993 berne yn it Kahnawake Mohâk Territoarium, in Yndianereservaat yn it suden fan 'e Kanadeeske provinsje Kebek. Etnysk heart hja ta de Mohâk (Mohawk), in subgroep fan 'e Irokezen. Lykas in grut diel fan 'e jongerein yn 'e reservaten yn Kanada en de Feriene Steaten hie se in drege jonkheid, wêryn't se ferskate kearen yn oanrekking kaam mei justysje. Uteinlik bedarre se by in korreksjoneel ynterfinsjeprogramma oan it John Abbott Kolleezje, in Ingelsktalige hegeskoalle yn Saint-Anne-de-Bellevue.

Kawennáhere Devery Jacobs yn 2017.

Karriêre

Har earste wurk as aktrise hie Jacobs yn 2007 yn 'e tillefyzjesearje The Dead Zone, in ferfilming fan in boek fan horror- en fantasy-auteur Stephen King. Se krige in beskate bekendheid mei har rol as Claudia Auditore yn 'e minysearje Assassin's Creed: Lineage, út 2009. Fierders spile se yn it begjin fan har karriêre noch yn ferskate oare searjes, de film South of the Moon (2008) en de koarte film The Blanketing (2013).

Foar har rol as Aila, de liedster fan in drugsbinde, yn 'e film Rhymes for Young Ghouls waard se yn 2013 op it Ynternasjonaal Filmfestival fan Toronto nominearre foar in Canadian Screen Award (de wichtichste filmpriis fan Kanada) yn 'e kategory bêste aktrise. Dat betsjutte foar Jacobs de definitive trochbraak. Fan 2013 oant 2015 fertolke se ien fan 'e haadrollen yn 'e searje Mohawk Girls. Teffens wurke se yn 2014 mei oan 'e fideoclip foar it nûmer Sisters fan 'e band A Tribe Called Red.

Yn 2019 spile Jacobs yn it twadde seizoen fan 'e dramasearje American Gods de jonge Yndiaanske studinte Sam Black Crow, in Sjeroky, dy't in twigeast is. Yn in fraachpetear sei Jacobs dêroer dat skriuwer Neil Gaiman, op waans romansearje de tillefyzjesearje basearre waard, der by de makkers fan 'e searje sterk op oanstien hie om Jacobs yn 'e rol fan Black Crow te casten. Se murk lykwols op dat sy harsels identifisearret as lesbysk en net as in twigeast "want ik bin in Mohâk en by ús bestiet dat net".

Kawennáhere Devery Jacobs yn 2024 op it filmfestival South by Southwest yn Austin.

Yn 2019 hie Jacobs ek in weromkearende rol as Lilith Bathory yn 'e earste beide seizoenen fan 'e Netflix-searje The Order. Fan 2021 oant 2023 hie se as Elora Danan ien fan 'e haadrollen yn 'e mannichfâld bekroande komeedzjesearje Reservation Dogs, oer in kloft Yndiaanske jongerein dy't opgroeid yn in Yndianereservaat op it plattelân fan 'e Amerikaanske steat Oklahoma. Foar de rol fan Danan waard Jacobs twa jier efterinoar (2023 en 2024) nominearre foar de Critics' Choice Television Award yn 'e kategory bêste aktrise yn in komeedzjesearje. Yn it twadde seizoen wie Jacobs behalven as aktrise ek as senarioskriuwster by Reservation Dogs belutsen. Yn it trêde seizoen wie se regisseur fan 'e ôflevering Wahoo!

Yn 'e mande mei Lamar Johnson wûn Jacobs yn 2024 by de Canadian Screen Awards de Radius Award (ien fan 'e spesjale prizen). Datselde jiers liende se as stimaktrise har stim oan it Inûyt-personaazje Alasie yn 'e tekenfilmsearje Ark: The Animated Series.

Priveelibben

Jacobs wennet op 't heden yn New York. Hja is lesbysk en hat in relaasje mei de Kanadeeske filmmakster D.W. Waterson. Tegearre hawwe se ek in eigen produksjemaatskippij oprjochte, mei de namme Night is Y.

Filmografy

Filmografy as aktrise
jier	titel	rol of funksje	opmerkings
tillefyzje
2007	The Dead Zone	Monique	minysearje
2009	Assassin's Creed: Lineage	Claudia Auditore	minysearje
2012	Exploding Sun	Nourhan	tillefyzjefilm
2013–2015	Mohawk Girls	Lollipop	fêste rol
2019	Cardinal	Sam Duchene	gastrol
2019–2020	The Order	Lilith Bathory	weromkearende rol
2019–2021	American Gods	Sam Black Crow	weromkearende rol
2021	Rutherford Falls	Jess Wells	weromkearende rol
2021	The 73rd Primetime Emmy Awards	harsels	as presintatrise; tillefyzjespecial
2021–2023	Reservation Dogs	Elora Danan	fêste rol; ek senarioskriuwster en regisseur
2023	What If...?	Kahhori	as stimaktrise; gastrol yn 2 ôfl.
2024	Echo	Bonnie	minysearje
2024	Ark: The Animated Series	Alasie	as stimaktrise; fêste rol
films
2008	South of the Moon	Alexa Dumont
2013	The Blanketing	Seniya	koarte film
2013	Rhymes for Young Ghouls	Aila
2015	A Big Black Short	Jess	koarte film
2016	The Sun at Midnight	Lia
2016	The Land of Rock and Gold	Andrea
2016	Running Eagle	Judith	koarte film
2016	Another WolfCop	Daisy
2016	Level 16	Vivien
2016	Stolen	n.f.t.	regisseur
2018	The Lie	Britney Ismali
2019	Blood Quantum	James
2019	Rustic Oracle	de âldere Ivy
2021	Bootlegger	Mani
2021	We Burn Like This	Chrissy B
2022	Spirit Rangers	Wind Eagle
2022	This Place	Kawenniióhstha
2023	Backspot	Riley	ek produsinte
202?	Oh. What. Fun.	…
fideospultsjes
2016	The Walking Dead: Michonne	Sam	as stimaktrise

Keppelings om utens

• (in) Biografyske gegevens en filmografy fan Kawennáhere Devery Jacobs yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Kawennáhere Devery Jacobs fan Wikimedia Commons.