Madeleine Stowe

Ut Wikipedy
Gean nei: navigaasje, sykje
Madeleine Stowe yn 2008.

Madeleine Stowe (folút: Madeleine Marie Stowe Mora; Los Angeles, 18 augustus 1958), is in Amerikaansk film- en tillevyzje-aktrise fan mingd Amerikaansk-Kostarikaansk komôf. Se is it bekendst wurden troch har rollen yn 'e films Stakeout, The Last of the Mohicans, Blink, Bad Girls, 12 Monkeys en The General's Daughter. Yn 1994 wûn se in Golden Globe foar har rol yn 'e film Short Cuts. Op 't heden spilet hja yn 'e tillevyzjerige Revenge, wêrfoar't se yn 2011 op 'e nij nominearre waard foar in Golden Globe.

Jonkheid en oplieding[bewurkje seksje | edit source]

Stowe, dy't berne waard yn it Queen of Angels Hospital yn Hollywood, wie de âldste fan trije bern yn it gesin fan Robert Stowe en Mireya Mora Steinvorth. Har heit stamme út in earme famylje út 'e steat Oregon, mar har mem kaam út in tige foaroansteande famylje út it Middenamerikaanske Kosta Rika. Ien fan Stowe har oer-oerpakes oan memmekant wie de politikus José Joaquin Mora Porras, de jongere broer fan Juan Rafael Mora Porras, dy't fan 1849 oant 1859 presidint fan Kosta Rika wie. In oaren fan Stowe har oer-oerpakes oan memmekant wie Bruno Carranza, dy't yn 1870 in fearnsjier presidint fan Kosta Rika wie. Dy syn frou, Stowe har oer-oerbeppe Gerónima Montealegre, wie wer de suster fan José María Montealegre Fernández, dy't Kosta Rika regearre tusken 1859 en 1863. Ien fan Stowe har oerpakes oan memmekant wie fierders in Dútske ymmigrant yn Kosta Rika.

Stowe groeide op yn Eagle Rock, in bûtenwyk fan Los Angeles. Har heit litte oan multiple skleroaze, en hja beselskippe him gauris nei syn medyske behannelings. Oarspronklik woe Stowe konsertpianiste wurde, en fan har tsiende oant en mei har achttjinde siet se op pianoles. Yn in fraachpetear lei se jierren letter út dat pianospyljen foar har fral in manear wie om net mei oare bern omgean te hoegen. Har Russyske pianolearaar Sergei Tarnowsky hie alle fertrouwen yn har, en joech har sels les fanôf syn stjerbêd. Doe't er úteinlik yn 'e âlderdom fan 96 jier stoarn wie, joech Stowe it pianospyljen deroan: "Ik hie gewoan it gefoel dat it tiid wie om minder op mysels te wêzen," sei se dêroer letter. Stowe studearre filmwittenskippen en sjoernalisme oan de Universiteit fan Súdlik Kalifornje yn Los Angeles. Har stúdzje koe har net bysûnder boeie, dat se bea oan om optredens te fersoargjen yn it Solaris, in teäter yn Beverly Hills, dêr't in filmagint har yn in toanielstik seach en har oan ferskate rollen op 'e tillevyzje en yn films holp.

Madeleine Stowe yn 2002.

Karriêre[bewurkje seksje | edit source]

Yn 1978 makke Stowe har debút op 'e tillevyzje mei in roltsje yn 'e plysjesearje Baretta, folge troch in hiele rist gastrollen yn searjes as The Amazing Spider-Man, Barnaby Jones en The Little House on the Prairie. Datselde jiers noch spile se foar it earst in haadrol, yn 'e tillevyzjefilm The Nativity, as de Faam Marije. Teffens spile se yn 'e minysearje The Gangster Chronicles, mei har takomstige man, de akteur Brian Benben, yn 'e haadrol. Yn it begjin en de midden fan 'e jierren tachtich wist se harsels te bedrippen mei rollen yn alderhanne tillevyzjerigen en -films.

Yn 1987 briek Stowe troch mei har byrol yn 'e film Stakeout, as Maria McGuire, de eks-freondinne fan in ûntsnapte krimineel dy't troch plysjes Richard Dreyfuss en Emilio Estevez temûk observearre wurdt yn 'e hope dat har eks-freon by har opdaagjen komt, sadat se him wer ynrekkenje kinne. Stakeout wie de bêst ferkeapjende film fan 1987. Neitiid wurke Stowe gear mei Mark Harmon yn 'e komeedzje Worth Winning (1989), mei Kevin Costner en Anthony Quinn yn 'e thriller Revenge (1990), mei Jack Nicholson yn 'e detektive The Two Jakes (1990) en mei Kurt Russell yn 'e misdiefilm Unlawful Entry (1992).

Datselde jiers (1992) spile se ek ien fan har meast ferneamde en heechst wurdearre rollen (al wûn se der dan gjin prizen mei) yn 'e (frije) ferfilming fan James Fenimore Cooper syn ferneamde roman The Last of the Mohicans. As tsjinspylster fan Daniel Day-Lewis sette se it personaazje fan Cora Munro del as in folle trochtaastender dame as dat Cooper har yn syn boek ôfskilderet. Mei dizze rol state se harsels omheech fan in bekend aktrise dy't gaadlik wie foar it spyljen fan ûnderstypjende byrollen, nei in echte filmstjer dy't haadrollen drage koe. Yn 1993 wûn Stowe foar de film Short Cuts, wêryn't se de frou fan 'e twangmjittich ligende en har bedragende plysjeman Tim Robbins spilet, in Golden Globe (yn 'e kategory bêste folsleine cast). Ek spile se dat jiers in kameoroltsje yn it ferfolch op Stakeout, titele Another Stakeout.

Yn 1994 spile Stowe de haadrol fan in bline muzikante yn 'e thriller Blink, wylst se ek de haadrol yn in oare thriller, China Moon, en ien fan 'e haadrollen yn 'e western Bad Girls fertolke. Dat selde jiers waard se troch it tydskrift People útroppen ta ien fan "de 50 Kreaste Minsken op 'e Wrâld", wylst se yn 1995 troch it tydskrift Empire keazen waard as ien fan "de 100 Meast Seksy Stjerren yn 'e Skiednis fan 'e Film". Ek yn 1995 spile se Bruce Willis syn sympatike psychiater yn 'e science fiction-film 12 Monkeys, wêrfoar't se nominearre waard foar in Saturn Award.

Madeleine Stowe yn 2008.

Nei in pear jier lins nommen te hawwen fanwegen de berte fan har dochter, makke Stowe yn 1998 in comeback mei de films The Proposition en Playing by Heart, yn 1999 folge troch de detektive The General's Daughter, wêryn't har tsjinspiler John Travolta wie. Yn dy film spilet Stowe ûndersykster Sara Sunhill, in ofsier fan 'e resjerzje fan it Amerikaanske Leger, dy't mei har kollega Paul Brenner (Travolta) de moard en skynferkrêfting fan in froulike legerkaptein ûndersiket. Foar dy rol waard Stowe nominearre foar in Blockbuster Entertainment Award en in ALMA Award. Nei de ieuwiksel folgen noch de science fiction-film Impostor (2001), it oarlochsdrama We Were Soldiers (2002), de aksje-komeedzje Avenging Angelo (2002) en de thriller Octane (2003).

Nei 2003 lei Stowe har mear ta op har gesin, en spile se net mear yn spylfilms. Har wurk yn 'e jierren 2000 loek net in protte belangstelling. Yn 2005 folge noch wol de tillevyzjefilm Saving Milly, in adaptaasje fan it boek mei deselde namme fan Morton Kondracke oer in frou dy't oanhelle rekket mei de sykte fan Parkinson. Yn 2007 sette se útein mei in weromkearende gastrol yn Jeff Goldblum syn boppenatuerlike detektivesearje Raines, dy't spitigernôch in pear moanne letter al stopset waard. Yn 2009 spile se fierders noch de haadrol yn 'e tillevyzjefilm The Christmas Hope. Pas yn 2011 kaam Stowe wer yn 'e skynwerpers te stean, doe't se de rol oannaam fan Victoria Grayson, de kreaze en machtige matriarch fan 'e Grayson-famylje, yn 'e dramasearje Revenge, dy't ûnferwachts in grut súkses waard, en dy't noch altyd (neijier 2013) rint. Foar dat optreden sleepte se yn 2012 in nominaasje foar de Golden Globe foar bêste aktrise yn in dramasearje yn 'e wacht. Yn april 2012 waard oan Stowe it fyfde plak taparte op 'e list fan kreaste froulju fan it tydskrift People.

Priveelibben[bewurkje seksje | edit source]

Madeleine Stowe is al sûnt 1982 troud mei de akteur Brian Benben, dy't se yn 1981 mette op 'e set fan 'e minysearje The Gangster Chronicles. Fan 2003 ôf wenje se yn 'e neite fan Johnson City, yn 'e steat Teksas. Se hawwe ien bern, in dochter, dy't fan May Theodora hjit en berne waard yn 1996. Stowe is belutsen by de stifting Artists for Peace en Justice, wêrfoar't se bygelyks yn 2008 nei Haïty ta reizge.

Filmografy (allinne spylfilms)[bewurkje seksje | edit source]

Jier Film Rol Opmerkings
1981 Gangster Wars Ruth Lasker
1987 Stakeout Maria McGuire
1988 Tropical Snow Marina
1989 Worth Winning Veronica Briskow
1990 Revenge Miryea
The Two Jakes Lillian Bodine
1991 Closet Land Victim
1992 Unlawful Entry Karen Carr
The Last of the Mohicans Cora Munro
1993 Another Stakeout Maria McGuire kameoroltsje; net fermeld op 'e ôftiteling
Short Cuts Sherri Shepard
1994 China Moon Rachel Munro
Blink Emma Brody
Bad Girls Cody Zamora
1995 12 Monkeys Kathryn Railly
1998 The Proposition Eleanor Barret
Playing by Heart Gracie
1999 The General's Daughter Sara Sunhill
2001 Impostor Maya Olham
2002 We Were Soldiers Julie Moore
Avenging Angelo Jennifer Barrett Allieghieri
2003 Octane Senga Wilson

Keppelings om utens[bewurkje seksje | edit source]

Boarnen, noaten en referinsjes[bewurkje seksje | edit source]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.