West Hollywood (Kalifornje)

Ut Wikipedy
Gean nei: navigaasje, sykje
West Hollywood (Kalifornje)
Sunsetblvd.jpg
Sunset Boulevard yn West Hollywood.
Flagge Wapen
Gjin Flagge (Bekend).PNG Seal of West Hollywood, California.svg
Sifers
Ynwennertal 35.288 (2013)
Oerflak 4,9 km² (ynkl. wetter)
4,9 km² (allinnich lân)
Befolkingstichtens 7.201,6 / km²
Stêdekloft 12.828.837 (2012)
Hichte 86 m
Polityk
Lân Flag of the United States.svg Feriene Steaten
Steat Flag of California.svg Kalifornje
County Flag of Los Angeles County, California.png Los Angeles County
Oar
Stifting 1897
Tiidsône UTC –8
Simmertiid UTC –7
Koördinaten 34°05′16″N 118°22′20″W
Webside www.weho.org
De lizzing fan Wes Hollywood yn Los Angeles County en yn 'e steat Kalifornje.
It stedhûs fan West Hollywood.

West Hollywood, troch ynwenners gauris ôfkoarte ta WeHo (útspr.: ['wi:hoʊ]; likernôch: "wiihoo"), is in stêd yn it suden fan 'e Amerikaanske steat Kalifornje. Dit plak leit yn Los Angeles County, grinzget yn it westen oan 'e stêd Beverly Hills en wurdt oan alle oare kanten omsletten troch wiken fan Los Angeles, wêrûnder Hollywood oan 'e eastkant. West Hollywood stiet bekend om syn grutte homoseksuële en lesbyske mienskip. Neffens in offisjele skatting út 2013 hie de stêd doe goed 35.000 ynwenners. It makket lykwols ûnderdiel út fan 'e stêdekloft fan Los Angeles, mei in befolking fan yn totaal krapoan 13 miljoen minsken.

Skiednis[bewurkje seksje | boarne bewurkje]

Oarspronklik waard de krite dêr't West Hollywood no leit, bewenne troch de Tongva-Yndianen. Nei't it gebiet geandewei de achttjinde iuw troch de Spanjerts kolonisearre wie, kaam it yn 1848, ûnder it Ferdrach fan Guadalupe Hidalgo, dat in ein makke oan 'e Meksikaansk-Amerikaanske Oarloch, by de Feriene Steaten te hearren. Tsjin 'e ein fan 'e njoggentjinde iuw waard de delsetting Sherman der stifte troch Moses Sherman en syn partners fan 'e Los Angeles Pacific Railroad. Yn 'e earste desennia fan 'e tweintichste iuw krige Sherman de reputaasje fan in plak dêr't eksintrikelingen har túltsjes úttúlje koene, en teffens fan in plak dat it ûnder de Drûchlizzing net sa nau naam mei it ferbod op it skinken fan alkohol.

Nettsjinsteande dat it grutte buorplak Los Angeles ferskate kearen besocht om Sherman te anneksearjen, keas dat derfoar om selsstannich te bliuwen, krektlyk as it buorplak Beverly Hills. Alle oare plakken yn 'e krite waarden meitiid lykwols troch Los Angeles opslokt, mei as gefolch Sherman en Beverly Hills in bestjoerlik selsstannige enklave yn Los Angeles waarden. Yn 1925, doe't de oangrinzgjende Los Anzjelynske wyk Hollywood ferneamd wurden wie om syn filmyndustry, feroare Sherman syn namme yn West Hollywood. Lang net alle ynwenners wiene it dêrmei iens, dat it wie in kontroversjeel beslút.

Lange tiid wie West Hollywood in doarp dat fierhinne bestjoerd waard troch Los Angeles County. Om't gokken yllegaal wie yn 'e stêd Los Angeles, mar wol tastien waard troch de autoriteiten fan Los Angeles County, ûntjoech West Hollywood him ta in regionaal sintrum fan 'e gokyndustry, dêr't fan 'e 1920-er jierren ôf it iene nei it oare kasino ferriisde. Al rillegau kamen dêr ek nachtklubs by, lykas de ferneamde Whisky a Go-Go, dy't gearkloften oan it diel fan Sunset Boulevard dat troch West Hollywood rûn, en dat bekend kaam te stean as de Sunset Strip.

De ferneamde nachtclub Whisky a Go-Go, oan 'e Sunset Strip.

Uteinlik rekke West Hollywood as sintrum fan it útgeanslibben út 'e graasje, hoewol't de Sunset Strip in sterke oantrekkingskrêft op toeristen hold. Underwilens hiene har in protte riken út 'e filmyndustry yn it doarp nei wenjen set, dy't oanlutsen waarden trochdat der in stik minder regels wiene om nei te libjen (bgl. op it mêd fan huzebou) as yn Los Angeles. Yn 'e 1960-er jierren waard West Hollywood in sintrum fan 'e hippykultuer. Yn 1978-1979 en 1988-1992 setten har by twa grutte ymmigraasjeweagen likernôch 6.000 Russyske Joaden yn West Hollywood nei wenjen. Sadwaande hat it hjoed de dei noch altyd de meast konsintrearre Russysktalige mienskip fan 'e Feriene Steaten.

Yn 1984 makke Los Angeles County plannen om 'e wetlike begrinzings op it mêd fan hierferhegings ôf te skaffen. De ynwenners fan West Hollywood beseften dat se sûnder begrinzings oan hierferhegings nea opbiede kinne soene tsjin it rikere diel fan 'e befolking fan Los Angeles en Beverly Hills, sadat se úteinlik út har eigen plak weijage wurde soene. Sadwaande ûntstie der in brede koälysje fan âlderein, Joaden, homo's en lesbiënnes en earmere hierders dy't bewurkmastere dat West Hollywood formeel stedsrjochten krige, sadat it syn eigen regeljouwing op it mêd fan hier trochfiere koe. Nei't dat slagge wie, waard der daliks ien fan 'e strangste hierbegrinzings fan 'e Feriene Steaten ynfierd.

Demografy[bewurkje seksje | boarne bewurkje]

Neffens in offisjele skatting troch it Amerikaanske Folkstellingsburo op grûn fan gegevens fan 'e folkstelling fan 2010 hie West Hollywood yn 2013 in befolking fan 35.288 minsken. De befolkingstichtens bedroech 7.201,6 minsken de km². Neffens gegevens fan 'e folkstelling fan 2010 wie doe fan 'e befolking fan West Hollywood 14,9% âlder as 65 jier en 4,6% jonger as 18 jier. Fierders bestie 59,7% fan 'e húshâldings út ien persoan, wylst 15,8% fan 'e befolking ûnder de earmoedegrins libbe. Wat de etnyske opbou fan 'e befolking oangiet, dy wie yn 2010 sa: 77,9% blanken; 10,5% Latino's; 5,4% Aziaten; 3,2% swarten; 0,3% Yndianen; 0,1% Polyneziërs, Melaneziërs en Mikroneziërs; 2,6% oaren of fan mingd etnysk komôf.

It djoere Château Marmont Hotel.

Berne yn West Hollywood[bewurkje seksje | boarne bewurkje]

Klimaat[bewurkje seksje | boarne bewurkje]

West Hollywood hat in drûch subtropysk klimaat, mei it hiele jier rûn waarm waar. July, augustus en septimber binne de waarmste moannen, mei in trochsneed temperatuer oerdeis fan 27 °C, wylst jannewaris it koelst is mei in trochsneed temperatuer fan 19 °C. Rekôrtemperatueren yn West Hollywood wiene 43,9 °C op 26 septimber 1963 en –4,4 °C op 4 jannewaris 1949. West Hollywood kriget jiers trochinoar mar 333,2 mm delslach. Sniefal is tige seldsum, en de lêste kear dat snie net daliks fuortteide nei't it delkaam, wie yn 1949.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.