Imanuelle Grives
| Imanuelle Grives | ||
 akteur | ||
 | ||
| Grives (2021) | ||
| persoanlike bysûnderheden | ||
| echte namme | Imanuelle Jacqueline Ruth Grives | |
| nasjonaliteit |  Nederlânsk | |
| berne | 3 april 1985 | |
| berteplak | Rotterdam (Súd-Hollân) | |
| etnisiteit |  Surinaamsk-Kreoalsk | |
| jierren aktyf | 2005 – no | |
| offisjele webside | ||
| Imanuelle Grives op Twitter | ||
Imanuelle Grives (folút: Imanuelle Jacqueline Ruth Grives; Rotterdam, 3 april 1985) is in Nederlânsk aktrise fan Surinaamsk komôf. Hja briek yn 2012 troch mei har rol as de wielderige swarte Rowanda yn 'e film Alleen Maar Nette Mensen.
Libben en karriêre
[bewurkje seksje | boarne bewurkje]Grives waard yn 1985 yn Rotterdam berne út Surinaamsk-Kreoalske âlden. Nei de middelbere skoalle folge se in oplieding maatskiplik wurk en tsjinstferliening, mar ûnder dy stúdzje kaam se ta de ûntdekking dat eins mear op hie fan aktearjen. Dêrfandinne dat hja har as trainingsaktrise ynskriuwe liet by ferskate ympressariaten. Uteinlik naam Grives yn 2005/2006 in jier lins fan har oplieding om har oan te sluten by de teätergroep Young Stage. Dêr koe se doe in jier lang betelle aktearje en sa har talinten ûntwikkelje. Ek die hja dêr presintaasjewurk en joech hja workshops oan oare begjinnende akteurs.
Neitiid wurke Grives by ferskate profesjonele teäterselskippen, wêrûnder ALBA Theaterhuis en Theatergroep Siberia. Yn 2008 wûn hja mei ALBA de priis foar "nijsgjirrichmeitsjend talint" en de Arend Hauerpriis (de haadpriis) op 'e Theater4daagse. It jiers dêrop makke Grives har filmdebút as in ekstravagante crackhoer en de tsjinspylster fan Tygo Gernandt yn Carmen van het Noorden. Yn 2011 wie se op 'e tillefyzje tsjen as Chanel yn 'e VPRO-bernerige Dr. Cheezy, as Molly yn Mixed Up fan 'e NCRV, en as folksfrou yn 'e tillefyzjefilm Mijn Avonturen door V. Swchwrm.
Grives har trochbraak kaam yn 2012, doe't se yn 'e kontroversjele film Alleen Maar Nette Mensen de rol fan 'e wielderige Rowanda fertolke. Har tsjinspilers yn dizze humoristyske ferfilming fan it boek mei deselde namme fan skriuwer Robert Vuijsje wiene Géza Weisz, Jeroan Krabbé en Annet Malherbe. Grives har personaazje wie in ordinêr frommes út in Surinaamsk gesin, dy't it oanlei mei in Joadske jonge út in rike famylje. (De stereotypyske ôfbylding fan Surinamers en Joaden late lykwols ta beskuldigings fan rasisme en antysemitisme.) Foar dizze rol, dêr't se in nominaasje foar in Rembrandt Award mei yn 'e wacht sleepte, moast Grives 15 kg oankomme. Yn in fraachpetear op 'e tillefyzje fertelde se fernuvere dat se doe ynienen (yn har priveelibben) folle mear oandacht fan manlju krige as dat se wend wie.
Sûnt 2012 wie Grives fral op 'e tillefyzje te sjen, mei û.m. in gastrol yn 'e plysjesearje Flikken Maastricht (2012), in byrol yn 'e rige Bloedverwanten (2014) en in haadrol yn 'e tichthúsrige Celblok H (2014-2015). Fierders die se yn 2014 mei oan it realitytillefyzjeprogramma Expeditie Poolcirkel. Yn 2019 die Grives mei oan it SBS6-programma It Takes 2.
Op 21 july 2019 waard Grives op it muzykfestival Tomorrowland, yn it Belgyske Boom, arrestearre troch de plysje. Hja hie ferskate soarten soft- en harddrugs (û.m. kokaïne, ketamine, MDMA en kannabis) yn har besit. By in hûssiking op it adres dêr't se ferbleau, waarden noch mear drugs oantroffen. Grives bekende drugs ferkocht te hawwen, mar neffens har abbekaat hie se dat inkeld dien om har yn te libjen yn in nije filmrol as drugsdealer. De Belgyske autoriteiten wiene skeptysk oer dat ferhaal en stelden dat it hoe dan ek strafber wie wat se dien hie. Op 10 oktober waard foar de rjochtbank yn Antwerpen twa jier finzenisstraf en €1.000 boete tsjin Grives easke foar drugsbesit en drugshannel. Om't yn Belgje straffen fan minder as 3 jier net útsitten hoege te wurden mar almeast mei in foarm fan hûsarrest ôfdien wurde, soe Grives net de finzenis yn hoege. Op 8 novimber waard Grives troch de Belgyske rjochter feroardiele ta in boete fan €1000 en in finzenisstraf fan twa jier. Under it Belgysk rjocht kaam dat derop del dat se yn totaal 8 wiken de sel yn moast, wat betsjutte dat se mei ôflûk fan seis wiken foararrest noch mar twa wiken hoegde te sitten. Grives gie net yn heger berop.
Boek
[bewurkje seksje | boarne bewurkje]Tegearre mei sjoernalist Anton Slotboom skreau Grives it boek Imanuelle - Mijn vechtershart oer de oanhâlding en alles dat dêrta laat hie, de perioade yn de finzenis en de tiid koart dêrnei. It boek ferskynde yn desimber 2020 by Uitgeverij Prometheus. Ek har famyljeskiednis waard deryn op it aljemint brocht.
Filmografy
[bewurkje seksje | boarne bewurkje]| Film | |||
|---|---|---|---|
| Jier | Produksje | Rol | Opmerkingen |
| 2012 | Alleen maar nette mensen | Rowanda | |
| 2017 | Tuintje in mijn hart | Surya | byrol |
| 2017 | Weg van jou | Josje | |
| 2018 | Vechtmeisje | Cecilia | |
| 2019 | De club van lelijke kinderen | Kliener opfriskamp | byrol |
| 2022 | Zwanger & Co | Jayda | byrol |
| 2025 | Lekker met de meiden | Ace | byrol |
| Telefyzje | |||
| Jier | Produksje | Rol | Opmerkingen |
| 2012 | Flikken Maastricht | Brenda Mostard | Gastrol |
| 2012 | Bloedverwanten | Sekretaresse | |
| 2014- | Celblok H | Dorien 'Door' Breeveld | |
| 2014 | Expeditie Poolcirkel | Kandidaat | |
| 2015 | Vechtershart | Selma Bisschop | |
| 2015 | Voetbalmeisjes | Shirley | |
| 2017 | The Homeless Experience | harsels | |
| 2017–2020 | Papadag | Monique | |
| 2017 | Wie is de Mol? | kandidaat | ôffaller 6 |
| 2017 | De Kleine Lettertjes | dielnimmer | |
| 2017 | Risky Rivers | dielnimmer | |
| 2018 | Flikken Rotterdam | Saskia van Dijk | ôfl. 3.03–3.06 |
| 2018-2020 | SpangaS | Ishana Vrijland | seizoen 12 & 13 |
| 2019 | De Gordon tegen Dino Show | dielnimmer | |
| 2019 | It takes 2 | kandidaat | |
| 2019 | Keizersvrouwen | Pamela | |
| 2020 | Alle hands aan dek | kandidaat | |
| 2021 | Adem in, Adem uit | Adinda | |
| 2021 | Special Forces VIPS | harsels | |
| 2022 | Zenith II | Carla | |
| 2022 | De gevaarlijkste wegen van de wereld | harsels | ôflevering 6 |
| 2023 | Secret Duets | harsels | |
| 2023 | Cast | harsels | |
| 2023 | That's My Jam | dielnimmer | |
| 2024 | De slimste mens | dielnimmer | |
| 2024 | Moordfeest | dielnimmer | |
| 2024 | Zina | Lorraine Alvarez | seizoen 2 |
| 2024 | Mocro Maffia | Meredith | seizoen 6 |
| 2024 | Een van ons | resjersjeur Joanna | |
Prizen en nominaasjes
[bewurkje seksje | boarne bewurkje]| Jier | Priis | Resultaat | Kategory | Foar |
|---|---|---|---|---|
| 2008 | Theater4daagse | wûn | priis foar "nijsgjirrichmeitsjend talint" (mei ALBA Theaterhuis) | |
| wûn | Arend Hauerpriis (haadpriis) (mei ALBA Theaterhuis) | |||
| 2013 | Rembrandt Award | nominearre | bêste Nederlânske aktrise | Alleen Maar Nette Mensen |
Keppelings om utens
[bewurkje seksje | boarne bewurkje]| Boarnen, noaten en/as referinsjes: |
|
Foar boarnen en oare literatuer, sjoch ûnder: Bronnen, noten en/of referenties, op dizze side. |