Geau's Mole

Ut Wikipedy
Jump to navigation Jump to search
Geau's mole

De Geau's Mole is in poldermole beëasten Top en Twel yn de gemeente Wymbritseradiel.

Beskriuwing[bewurkje seksje | boarne bewurkje]

De Geau's Mole, in mealreeë spinnekopsmole dy't oan it Prinses Margrietkanaal stiet, is út de earste helte fan de njoggentjinde iuw. It is net bekend yn hokker jier hy krekt boud waard: yn boarnen wurde de jiertallen 1832 en 1841 neamd. De mole waard setten foar it bemeallen fan de Geaupolder, in simmerpolder beëasten Toppenhuzen, tsjintwurdich in natoergebiet dat eigendom is fan Steatsboskbehear. De Geau's Mole, mei in flecht fan 12,20 m., is it ienige oerbleaune eksimplaar fan de eartiids ûngefear tweintich poldermoles dy't ea om Toppenhuzen/Twellingea stien hawwe.

Yn 1954 en 1965 waard de Geau's Mole restaurearre. Hy waard yn 1981 eigendom fan de Stifting De Fryske Mole. De mole wie doe yn minne steat, sadat hy fan de ryksmonumintelist helle waard en de destiidske Rykstsjinst foar de Monimintesoarch tastimming joech him slope te litten. Dêr kaam in soad ferset tsjin, wat der ta late dat dochs wer alle jierren in bedrach foar it ûnderhâld fan de mole beskikber steld waard. De kosten fan in restauraasje woe it Ryk lykwols net foar har rekken nimme. Uteinlik barde dat yn 1987 op kosten fan de gemeente Wymbritseradiel, de provinsje Fryslân en it Prins Bernhardfûns.

De Geau's Mole, dy't allinnich oer it wetter berikt wurde kin, is op ôfspraak te besichtigjen.

Sjoch ek[bewurkje seksje | boarne bewurkje]

Keppeling om utens[bewurkje seksje | boarne bewurkje]