Noard-Brabân

	Noard-Brabân
	gjin folksliet
	polityk
lân	Nederlân
status	provinsje
oprjochting	1814
offisjele taal	Nederlânsk
haadstêd	De Bosk
tal gemeenten	56
kommissaris fan; de kening	Ina Adema; (VVD)
	geografy
geograf. koördinaten	51°41' NB 5°18' EL
oerflak	5.082,06 km² (2015)
• dêrfan lân	4.901,54 km²
• dêrfan wetter	180,52 km²
rang provinsjes	2e fan 12
	demografy
ynwennertal	2.644.8721
teldatum	1 jannewaris 2024
rang provinsjes	3e fan 12
befolkingstichtens	536 / km²
grutste plak	Eindhoven
religy (2015)	48,0% roomsk-katoliken; 38,8% ateïsten en agnosten; 5,6% protestanten; 4,4% moslims; 3,3% oaren
	oar
NUTS	NL41
ISO 3166-2	NL-NB
tiidsône	MET (UTC+1)
simmertiid	MEST (UTC+2)
	offisjele webside
	www.brabant.nl
	1) boarne: CBS-StatLine

Noard-Brabân (Nederlânsk: Noord-Brabant) is in provinsje fan Nederlân, dy't as sadanich bestiet sûnt 1814. It hat 2.644.872 ynwenners (1 jannewaris 2024, boarne: CBS) en in oerflak fan 5.082 km². De haadstêd fan de provinsje is De Bosk, mar it grutste plak is Eindhoven.

Geografy

Noard-Brabân is in provinsje yn it suden fan Nederlân. De provinsje grinzet yn it noarden oan de Nederlânske provinsjes Súd-Hollân en Gelderlân, yn it westen oan Seelân, yn it easten oan Limburch, en yn it suden oan de Belgyske provinsjes Antwerpen en Limburch.

De provinsje is relatyf flak en bestiet út deksângebieten, trochsnien troch beekdellingen. Yn it noarden lizze de rivierklaaigebieten en yn it noardwesten binne noch restanten fan it eardere Hollandveen. De grins fan de provinsje wurdt yn it noarden foarme troch de rivier de Maas. In stikmannich stosân- en heidegebieten binne bewarre bleaun, lykas yn de Loonse en Drunense Duinen, de Strabrechtse Heide en de Kampina. Yn it easten fan de provinsje binne yn ferskate reservaten fan de Peel noch heechfeanrestanten te finen. De wettergebieten fan Noard-Brabân binne yn it noarden fan de provinsje te finen. Dêr lizze ûnder oaren de De Biisbosk en it Lân fan Heusden en Altena.

Skiednis

Nei alle gedachten hawwe de Kelten de earste bewenners west fan Noard-Brabân. Nei it ferfarren fan de Romeinen waard it gebiet ynlive troch de Franken en ûnderdiel fan it Frankyske Ryk. Yn de midsiuwen kaam Noard-Brabân foar it grutste part by it hartochdom Brabân. Yn de rin fan de Tachtichjierrige Oarloch waard it dêrfan ôfspjalte en as generaliteitslân troch de Steaten-Generaal bestjoerd.