Ypeymûne
De Ypeymûne is in poldermole west fan Ryptsjerk yn de gemeente Tytsjerksteradiel. It is in reiddekte houten achtkante mûne mei stiennen fjildmuorren.
De Ypeymûne stie earst fan 1858 ôf by it oan de noardrâne fan Tytsjerk lizzende park Fiversburch (ek wol de Bosk fan Ypey neamd). Fanwege in roedebrek waard de mûne yn 1958 bûten bedriuw steld. Hy waard restaurearre, mar dêrby krige hy te koarte roeden, út noed oer de mooglikheid dat de jongerein oars yn de ûnbeheard steande mûne klimme soe. De Ypey Mûne rekke dêrnei yn ferfal. Yn de jierren 1980-1981 waard de mûne fersetten en op syn nije stee oan de Ryptsjerkster Feart restaurearre. Hjir bemealt de mûne de 13 ha grutte simmerboezem fan de Koekoekspetten.
De Ypey Mûne is eigendom fan de Stifting De Fryske Mole.
