Trolls (franchise)

Trolls
betinker	Thomas Dam
eigner	DreamWorks Animation
lân	Feriene Steaten
begjinjier	2016
films
langspylfilms	● Trolls ● Trolls: World Tour ● Trolls Band Together
tillefyzje
tekenfilmsearjes	● Trolls: The Beat Goes On! ● Trolls: Trolls Topia
specials	● Trolls: Holiday ● Trolls: Holiday in Harmony
muzyk
soundtracks	● Trolls ● Trolls: World Tour
offisjele webside
www.dreamworks.com/trolls

Trolls is in Amerikaanske mediafranchise fan 'e filmstudio DreamWorks Animation, ynspirearre op 'e súksesfolle Good Luck Trolls-popkes dy't yn 'e 1960-er jierren kreëarre waarden troch Thomas Dam. Anno 2021 bestiet de franchise út twa kompjûteranimearre lange tekenfilmmusicals, twa tekenfilmsearjes op 'e tillefyzje en in tillefyzjespecial.

Films

Trolls

De Wikipedy hat ek in side Trolls (film).

Yn Trolls ûntsnappe de trollen út harren oarspronklike wente, de trollebeam, om't se dêr finzen holden wurde troch de ellindige bergens, meunsterlike wêzens dy't trollen ite om lokkich te wurden. As prinsesse Poppy letter troch in grut feest mei lûde muzyk en fjoerwurk it nije ûnderkommen fan 'e trollen oan 'e bergens ferriedt, moat se neitiid har troch de bergens finzennommen freonen sjen te befrijen. Dêrfoar ropt se de help yn fan Branch, de iennichste trol dy't net yn in oanhâldende steat fan gelokkigens ferkeart.

De haadrollen waarden ynsprutsen troch Anna Kendrick en Justin Timberlake, mei Zooey Deschanel, Christopher Mintz-Plasse, Christine Baranski, Russell Brand, James Corden, Gwen Stefani, Jeffrey Tambor en John Cleese yn ûnderstypjende rollen.

Trolls waard regissearre troch Mike Mitchell nei in senario fan Jonathan Aibel en Glenn Berger. De film gie op 4 novimber 2016 yn premiêre, en brocht $346,9 miljoen op tsjin in budget fan $125 miljoen. Trolls waard nominearre foar in grut tal prizen, wêrûnder sawol de Oscar as de Golden Globe foar bêste orizjinele liet (Can't Stop the Feeling! fan Max Martin, Shellback en Justin Timberlake). De film wûn de Grammy Award foar bêste liet skreaun foar fisuele media (ek foar Can't Stop the Feeling!).

Trolls: World Tour

De Wikipedy hat ek in side Trolls: World Tour.

Yn Trolls: World Tour besiket de op macht beluste keninginne Barb (Rachel Bloom) fan 'e rocktrollen alle oare muzykstammen fan 'e trollen ûnder har bewâld te bringen. Poppy (Anna Kendrick), no keninginne fan 'e poptrollen, is de iennichste dy't har snoade plannen tsjinkeare kin. Dêrfoar hat se wol ferlet fan 'e help fan har freonen, mar as se wegeret om nei harren te harkjen, liket se dy help te ferliezen. Barb wit de ûnderlinge striid tusken de trollestammen yn har foardiel te besljochtsjen, mar as Poppy har skeel mei Branch (Justin Timberlake) en har oare freonen byleit, slagget it harren om alles noch wer rjocht te breidzjen.

Trolls: World Tour waard regissearre troch Walt Dohrn, dy't as ko-regisseur ek al by de earste film belutsen west hie. Hy wurke nei in senario fan Jonathan Aibel en Glenn Berger. De film gie op 10 april 2020 yn premiêre, mar brocht omreden fan 'e op dat stuit hearskjende wrâldwide koroanafiruspandemy, en de beheinings yn it iepenbiere libben dy't dêrmei mank giene, mar $44,8 miljoen op tsjin in budget fan $90 oant 110 miljoen.

Trolls Band Together

Trolls Band Together is in oankommend trêde diel fan 'e Trolls-filmsearje, dat yn novimber 2023 yn 'e bioskopen ferwachte wurdt.

Tillefyzje

Tillefyzjespecial

Trolls: Holiday

De Wikipedy hat ek in side Trolls: Holiday.

Yn Trolls: Holiday docht bliken dat de bergens nei de ôfskaffing fan Trollstice (de iene dei yn it jier dat se trollen ieten) gjin feestdagen mear hawwe. Keninginne Poppy (Anna Kendrick), Branch (Justin Timberlake) en harren freonen sette ôf nei de stêd fan 'e bergens om dat euvel te ferhelpen. Nei gâns trelit wurdt der in nije feestdei betocht, Troll-A-Bration, dy't de trollen en bergens mei-inoar fiere kinne. Trolls: Holiday waard regissearre troch Joel Crawford nei in senario fan Josh Bycel en Jonathan Fener. It is in tillefyzjespecial mei in spyldoer fan 30 minuten, dy't op 24 novimber 2017 yn 'e oanrin nei it krystseizoen foar it earst op 'e Amerikaanske tillefyzje útstjoerd waard troch NBC.

Trolls: Holiday in Harmony

De Wikipedy hat ek in side Trolls: Holiday in Harmony.

Yn Trolls: Holiday in Harmony hâlde de trollen in útwikseling fan kado's yn ferbân mei de feestdagen. Keninginne Poppy en har frijer Branch hawwe by tafal inoars nammen lutsen, mar witte net wat se inoar jaan moatte. Trolls: Holiday in Harmony waard regissearre troch Sean Charmatz en Tim Heitz nei in senario fan harrensels. It is in tillefyzjespecial mei in spyldoer fan 26 minuten, dy't op 26 novimber 2021 yn 'e oanrin nei it krystseizoen foar it earst op 'e Amerikaanske tillefyzje útstjoerd waard troch NBC.

Tekenfilmsearjes

Trolls: The Beat Goes On!

De Wikipedy hat ek in side Trolls: The Beat Goes On!.

Trolls: The Beat Goes On! is in fantasy-musicalbernetekenfilmsearje produsearre troch DreamWorks Animation Television oer de fierdere aventoeren fan 'e trollen. Om 'e stimmen yn te sprekken waard in nije cast fan stimakteurs gearstald, mei û.o. Amanda Leighton as keninginne Poppy en Skylar Astin as Branch. Der waarden fan jannewaris 2018 oant novimber 2019 acht seizoenen (searjes) makke, fan yn totaal 52 ôfleverings besteande út 103 ôfsûnderlike segminten. Trolls: The Beat Goes On! waard beskikber makke fia streamingtsjinst Netflix.

Trolls: Trolls Topia

De Wikipedy hat ek in side Trolls: Trolls Topia.

Trolls: Trolls Topia is in nije tekenfilmsearje oer de trollen mei deselde cast fan stimakteurs as Trolls: The Beat Goes On! De searje waard produsearre troch DreamWorks Animation Television. De earste ôfleverings kamen op 19 novimber 2020 beskikber fia de streamingtsjinsten Hulu en Peacock. Anno 2021 is der ien seizoen fan makke mei yn totaat 13 ôfleverings besteande út 25 segminten.

Muzyk

De filmmuzyk fan 'e Trolls-films kaam út op twa soundtrackalbums:

• 2016 – Trolls (soundtrack)
• 2020 – Trolls: World Tour (soundtrack)

Keppelings om utens

• (in) Offisjele webside fan Trolls

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.

Trolls (filmsearje)
lange films
Trolls (2016) • Trolls: World Tour (2020) • Trolls Band Together (2023)
koarte films
Trolls: Holiday (2017) • Trolls: Holiday in Harmony (2021)