Sint-Nikolaastsjerke (Brussel)

Ut Wikipedy
Jump to navigation Jump to search
Sint-Nikolaastsjerke
Bruxelles - Eglise Saint-Nicolas 01.JPG
lokaasje
lân Flag of Belgium.svg Belgje
regio Flag of the Brussels-Capital Region.svg Brussel
plak Greater coat of arms of the City of Brussels.svg Brussel
adres Boterstraat, 1000 Brussel
bysûnderheden
type bouwurk tsjerke
boujier 12e, 17e en 1956
boustyl Gotyk
webside Side parochy

De Sint-Nikolaastsjerke (Frânsk: Église Saint-Nicolas, Nederlânsk: Sint-Niklaaskerk) is in roomsk-katolike tsjerke yn it sintrum fan de Belgyske haadstêd Brussel.

Skiednis[bewurkje seksje | boarne bewurkje]

De Nikolaastsjerke giet werom op in yn de 12e iuw oan de hillige Nikolaas fan Myra wijde stifting fan Busselske keaplju. Al rillegau waard de oarspronklike kapel fergrutte ta in echte tsjerke en in iuw letter waard njonken de tsjerke útein set mei de bou fan in grutte toer. Yn 1367 stoartte dy toer by in fûle stoarm foar in part yn. De romaanske ûnderbou bleau lykwols bestean en it stedsbestjoer liet op dy ûnderbou in nije toer bouwe, dy't healwei de 17e iuw nochris ferhege waard mei in ferdjipping en mei in karriljon fan 38 klokken útrist waard.

Ynterieur

By de Frânske bombardeminten op 13, 14 en 15 augustus 1695, wertroch't in grut part fan de binnenstêd oan pún sketten waard, rekke ek de Sint-Nikolaastsjerke slim skeind. De toer fette fjoer en stoartte foar in twadde kear yn. Ut dy dagen stamt in ynmitsele kanonskûgel yn ien fan de pylders yn it middenskip. It sintrum fan Brussel waard fuort dêrnei wer opboud en sa ek de Sint-Nikolaastsjerke. De toer dy't doe wer opboud waard stoartte yn 1714, in jier nei de foltôging, foar de tredde kear yn, nei alle gedachten fanwegen it gewicht fan de klokken, en waard dêrnei net wer opboud.

Yn it ramt fan de Frânske Revolúsje waard de tsjerke yn 1779 foar de earetsjinst sletten en dêrnei ferkocht. De tsjerke soe sloopt wurde, mar katolike ynwenners kochten de tsjerke werom en yn 1804 waarden de doarren wer iepene foar de earetsjinst.

Yn de jierren 1950 folge de bou fan in nije westlike gevel. Ut dy tiid datearret ek it grutte finster fan Marije-Himelfeart fan Guy Chabrol. De tsjerke waard tusken 2002 en 2006 folslein restaurearre.

Ynterieur[bewurkje seksje | boarne bewurkje]

Yn de Nikolaastsjerke wurde de reliken bewarre fan de martlers fan Gorkum, dy't in lytse tweintich jier nei de moard yn Brielle yn 1572 troch twa Fransiskanen opgroeven waarden en nei de Súdlike Nederlannen oerbrocht waarden. De neogoatyske skryn fan de martlers waard makke troch de Dútske smid Franz Xavier Hellner (1819-1901).

It neamen wurdich is ek it skilderij fan de "Jongfaam mei it sliepende Bern', dat oan Pieter Paul Rubens of oan ien fan syn learlingen taskreaun wurdt. Fierder hingje der yn de tsjerke wurken fan Joseph Stallaert (1825-1903), Willem Herreyns (1743-1827) en Jan fan Orley (1665-1735).

De koerstuollen út 1381 binne dekorearre mei medaillons, dy't ferhelje oer it libben fan de patroanhillige fan de tsjerke.

Ofbylden[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes: