Fiskerijdagen Harns

	Fiskerijdagen Harns ; Visserijdagen Harlingen
	plak en tiid
lân	Nederlân
provinsje	Fryslân
gemeente	Harns (gemeente)
plak	Harns (stêd)
holden yn	haven en binnenstêd
tiid fan it jier	augustus / septimber
	bysûnderheden
gelegenheid	iepen dagen fiskerijsektor
soarte evenemint	kultureel
bestean	1959 – no
org. troch	Stifting Fiskerijdagen Harns
	offisjele webside
	www.visserijdagenharlingen.nl

De Fiskerijdagen Harns (Nederlânsk en offisjeel: Visserijdagen Harlingen) foarmje in evenemint dat fjouwer dagen duorret en elts jier yn ein augustus en/of begjin septimber holden wurdt yn 'e Fryske havenstêd Harns.^[1]^[2] It barren, wêrfan't de earste edysje holden waard yn 1959,^[2] ûntstie oarspronklik as in (inkele) iepen dei fan 'e Harnzer fiskerijsektor. It is letter útgroeid ta in meardeisk en folle algemiener folksfeest, hoewol't ûnderdielen yn it ramt fan 'e fiskerij noch altyd wol in sintraal plak ynnimme. Dêrnjonken is de promoasje fan Harns as toeristyske bestimming almar wichtiger wurden. Yn 2009 waard it fyftichjierrich bestean fan it evenemint fierd mei in ekstra grut feest.^{[boarne nedich]}

Organisaasje en besikers

De Fiskerijdagen binne bedoeld as in feest foar Harnzers en âld-Harnzers, mar likegoed foar lju fan bûten. Bewenners en besikers wurde tsjin 'e eftergrûn fan 'e seishûndert histoaryske monuminten dy't de stêd ryk is, fjouwer dagen efterinoar traktearre op muzyk, sang, dûns, folkloare, keunst, gastronomy, merken, merke, kultuer en sport.^[1] It muzykfestival op 'e sneontejûn hjit de Nacht fan Harns.^[3] De Fiskerijdagen Harns wurde organisearre troch de Stifting Fiskerijdagen Harns.^[2] It feest waard yn 2010 útroppen ta it bêste regio-evenemint yn Nederlân.^[1] Bekend is dat besikers benammen út Fryslân komme, mar der binne ek besikers út Drinte, Grinslân en West-Fryslân.^{[boarne nedich]} Mei 170.000 besikers wiene de Fiskerijdagen yn 2006 it grutste meardeiske evenemint fan Fryslân.^{[boarne nedich]}

59e edysje

Yn 2018 wurdt de 59e edysje fan 'e Fiskerijdagen Harns op 29 augustus iepene mei in optreden fan sjongster Jennie Lena (bekend as finaliste fan 'e talintejacht op 'e tillefyzje The Voice of Holland). Dat bart op it grutte poadium op 'e Grutte Bredepleats, nei taspraken troch boargemaster Roel Sluiter en Jules Dutrieux, de foarsitter fan 'e Stifting Fiskerijdagen Harns.^[2] Fêste ûnderdielen binne fan âlds û.m.:^[1]

de iepen dei fan 'e Fiskfeiling Urk, lokaasje Harns mei in grutte Fisktafel;
flean- en rêdingsdemonstraasjes troch ferskate Definsje-ûnderdielen en oare helptsjinsten;
in manifestaasje op 'e Rommelhaven om 'e skiednis fan 'e fiskerij hinne;
in floatskôging;
in fjoerwurkshow;
de Fiskerijdagerin (sûnt 1988);
de Nacht fan Harns.

Dêrnjonken binne der ek nijere ûnderdielen, lykas:^[1]

in workshop roeien;
it yn 2017 foar it earst yntrodusearre hurdfytskritearium;
in sambafestival, dat yn 2018 foar it earst holden wurdt.

Gallery

Keppelings om utens

(ned) Offisjele webside fan 'e Fiskerijdagen Harns

Boarnen, noaten en referinsjes

Boarnen, noaten en/as referinsjes:

↑ ^1,0 ^1,1 ^1,2 ^1,3 ^1,4 Ynformaasje oer de Fiskerijdagen Harns 2018 op 'e eigen webside.
↑ ^2,0 ^2,1 ^2,2 ^2,3 TVOH-finaliste Jessie Lena opent Visserijdagen 2018, yn: van Wad tot Stad, 23 maaie 2018, s. 3.
↑ Programma Visserijdagen Harlingen 2018, yn: van Wad tot Stad, 28 augustus 2018, s. 27.

[vh-1] 1,0 ^1,1 ^1,2 ^1,3 ^1,4 Ynformaasje oer de Fiskerijdagen Harns 2018 op 'e eigen webside.

[vwts-2] 2,0 ^2,1 ^2,2 ^2,3 TVOH-finaliste Jessie Lena opent Visserijdagen 2018, yn: van Wad tot Stad, 23 maaie 2018, s. 3.

[3] Programma Visserijdagen Harlingen 2018, yn: van Wad tot Stad, 28 augustus 2018, s. 27.

[1]

[2]

[3]