Falls Church (Firginia)

Ut Wikipedy
Jump to navigation Jump to search
Falls Church
Falls Church.jpg
Sifers
Ynwennertal 13.508 (2013)
Oerflak 5 km² (ynkl. wetter)
5 km² (allinnich lân)
Befolkingstichtens 6.197 / km²
Stêdekloft 6.033.737
Hichte 99 m
Polityk
Lân Flag of the United States.svg Feriene Steaten
Steat Flag of Virginia.svg Firginia
Unôfh. stêd Falls Church
Oar
Stifting 1733
Tiidsône UTC-5
Simmertiid UTC-4
Koördinaten 38°52′56″N 77°10′16″W
Webside fallschurchva.gov
De lizzing fan Falls Church yn 'e steat Firginia.

Falls Church is ûnôfhinklike stêd (dy't dus net ûnder in county falt) yn it noardeasten fan 'e Amerikaanske steat Firginia. Neffens offisjele gegevens út 2013 hie dit plak doe likernôch 13.500 ynwenners. Falls Church is in foarstêd fan 'e Amerikaanske haadstêd Washington, D.C., en heart ta de stêdekloft fan Washington, D.C.-Baltimore, dy't rom 6 miljoen ynwenners hat. Neffens gegevens fan it Amerikaanske Folkstellingsburo hat Falls Church it leechste earmoedesifer fan alle Amerikaanske countys en ûnôfhinklike stêden.

Skiednis[bewurkje seksje | boarne bewurkje]

Oarspronklik waard it gebiet dêr't Falls Church no leit, bewenne troch Algonkwynsksprekkende Yndiaanske folken. Yn it lêste fearn fan 'e santjinde iuw begûnen Ingelske kolonisten har fanôf de kust fan Firginia yn 'e krite nei wenjen te setten. De Falls Church, dêr't de stêd nei ferneamd is, hiet oarspronklik William Gunnell's Church, en waard yn 1733 fan hout boud. Tsjin 1757 hie it gebou yn 'e folksmûle de namme fan Falls Church krigen, om't it oan 'e wichtichste wei stie dêr't de tabak oer ferfierd waard fanôf de lytse wetterfal (Little Falls) yn 'e rivier de Potomac.

Yn 1769 waard it houtene gebou ferfongen troch in stiennen tsjerke, dy't doe tagelyk oanwiisd waard as de haadtsjerke fan 'e nijfoarme parochy Fairfax. Nei de Amerikaanske Unôfhinklikheidsoarloch waard yn 1784 yn Firginia de Anglikaanske Tsjerke ôfskaft as steatstsjerke, wêrnei't de Falls Church syn funksje ferlear en it gebou oan syn lot oerlitten waard. Pas yn 1836 krige it wer in funksje as godshûs, diskear foar de Amerikaanske Episkopaalske Tsjerke.

Underwilens wie om 'e tsjerke hinne lykwols in lytse delsetting groeid, dy't nei it tsjerkegebou Falls Church kaam te hjitten. Krekt as safolle delsettings yn Firginia begûn is as in soarte fan útbuorren mei sintrale foarsjennings foar de omlizzende plantaazjes. Tsjin 1800 wie it lân werferkavele yn lytsere perselen, dy't troch gerniers en lânbouwers yn 'e regel bewurke waarden mei help fan slave-arbeid. Doe't der gjin tabak mear groeie woe, om't men de grûn alhiel útput hie, begûn men oare gewaaksen te ferbouwen, lykas weet, maïs en jirpels. Ek ûntstiene der herbergen en kroegen om 'e reizgers fan en nei de nije federale haadstêd Washington, D.C. te betsjinjen.

De Falls Church, dêr't de stêd nei neamd is.

Under de Amerikaanske Boargeroarloch (1861-1865), wêrby't Firginia him mei tsien oare súdlike steaten fan 'e Feriene Steaten ôfskate, gie Falls Church ferskate kearen oer yn oare hannen. Nei ôfrin fan 'e oarloch bleau it plakje noch lange tiid in plattelânske agraryske mienskip, al wûn it yn 1875 de status fan township. Tsjin 1900 wie Falls Church mei goed tûzen ynwenners it grutste plak yn Fairfax County. Yn 1948 waard Falls Church in ûnôfhinklike stêd. East Falls Church, dat fan 1875 oant 1936 diel útmakke fan Falls Church, heart net ta de ûnôfhinklike stêd, mar falt ûnder Fairfax County.

Demografy[bewurkje seksje | boarne bewurkje]

Neffens gegevens fan 'e folkstelling fan 2000 wie doe fan 'e befolking fan Falls Church 12,2% âlder as 65 jier en 23,4% jonger as 18 jier. Fierders bestie 43,9% fan 'e húshâldings út ien persoan, wylst 4,2% fan 'e befolking ûnder de earmoedegrins libbe. Wat de etnyske opbou fan 'e befolking oangiet, dy wie yn 2010 sa: 70,9% blanken; 9.4% Aziaten; 9,0% Latino's; 4,3% swarten; 0,3% Yndianen; 6,1% oaren of fan mingd etnysk komôf. In grut part fan 'e Aziatyske befolkingsgroep bestiet út etnyske Fjetnamezen, dy't har nei ôfrin fan 'e Fjetnamoarloch yn Falls Church nei wenjen set hawwe.

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.