Bruktearen

De Bruktearen (Latyn: Bructeri of Boructuari) wiene in West-Germaanske stam, dy't tahâlde yn it gebiet dat no Münsterland is, besuden it Teutoburger Wâld, fan sa'n 100 f.Kr. oant 350 nei Kristus. Letter is de stam opgien yn it gruttere Frankyske stamferbân.

Oer de Bruktearen is bekend dat sy yn 'e mande mei Sjerusken, Ampsivaren en oaren de Romeinske generaal Farus fersloegen yn de ferneamde slach yn it Teutoburger Wâld yn it jier 9 nei Kr. De Brukteryske profetesse Veleda stie yn heech oansjen by har stam. Neffens Tasitus foarsei sy de oerwinning fan de Bataven laat troch Julius Civilis yn harren opstân tsjin de Romeinen. It bêste plak om feiten oer de Bruktearen te finen is yn Soest (Westfalen). De namme fan it doarp Brochterbeck (distrikt Steinfurt) hat syn oarsprong yn de stamnamme fan de Bruktearen.

Neffens Tasitus (35) hat de Germaanske stam Chamaven it gebiet fan de Bruktearen oernaam.

pulsis Bructeris ac penitus excisis vicinarum consensu nationum...

de Bruktearen binne ferjage en benei útrûge by in kriich mei buorstammen.

Dochs wurdt der letter noch sprutsen fan de Bruktearen. Ut begjin 4e iuw binne de Brukterske foarsten Ascaricus en Merogaisus bekend. Yn 307 waard har stam ferslein troch Konstantyn. De finzennommen foarsten liet er yn de arena fan Trier foar de wylde bisten smite.
Op de Peutingerkaart (3e/4e iuw nei Kr.) waarden de Burcturi neamd yn it gebiet rjochts fan de Ryn foar de stêden Bonn en Keulen oer.