Lubentiuskirche (Dietkirchen)

Ut Wikipedy
Jump to navigation Jump to search
De Lubentiustsjerke fan de eastlike kant
Grûnplan fan de Lubentiustsjerke

De St.-Lubentiuskirche (Sint-Lubentiustsjerke) is in tsjerke yn it Dútske plak Dietkirchen, in Stadtteil fan de Hessyske gemeente Limburch oan de Lahn. De eardere stiftstsjerke stiet op in hege rots fuort oan de rivier de Lahn. Yn de tsjerke wurde de reliken fan de hillige Lubentius bewarre, itjinge de tsjerke in heech oansjen joech. It stift gyng op de 9e iuw werom, mar waard mei de sekularisaasje ophefd. Hjoeddedei is de tsjerke in katolike parochytsjerke, de súdeastlike Dreifaltigkeitskapelle (Kapel fan de Trijefâldichheid) wurdt troch de protestânske gemeente brûkt.

It bouwurk is in romaanske basilyk mei in dwersskip en in gevel mei dûbele tuorren.

Ynrjochting[bewurkje seksje | boarne bewurkje]

De tsjerke hat in ynrjochting dy't benammen út 18e iuwske keunstwurken bestiet. It Marienaltar (Marije-alter) yn de apsis fan it noardlike dwersskip is fan 1758. It Petrusaltar oan de eastlike muorre fan it súdlike dwersskip waard yn 1760 boud.

It houten krús oan de muorre fan it middenskip nei de fiering datearret út de 19e iuw.

Yn it súdlike sydskip is in swartmarmeren epitaaf út 1702 fan de dekaan Johann Leonidas Schlüpgen. Rjochts dêrnjonken hinget it epitaaf foar Emmerich Friedrich de Fabre út 1719, dat fan swart en wyt marmer makke waard. Yn it folgjende travee rjochting it westen hingje acht staasjes fan de krúswei út 1974. Yn in nis fan de bûtenmuorre is in byld fan in piëta te sjen.

It renêssânse epitaaf yn it eastlike diel fan it noardlike sydskip waard yn 1550 foar de ridder Philipp fan Dehrn oprjochte. Dêrnjonken hingje trije izeren foetringen. Neffens de oerlefering soe de ridder Dietrich fan Dehrn de foetringen út tankberens oan de tsjerke jûn ha, nei't dizze út Turkske finzenskip befrijd waard. De krúsigingsgroep yn it folgjende travee yn westlike rjochting is in wurk út 1699. Njonken it yngongsportaal hinget in houten byld fan Jakobus de Aldere. Oan de oare kant fan de doar stiet it basalten doopfont út de 13e iuw, it houten deksel fan it doopfont datearret út 1600.

Kapellen[bewurkje seksje | boarne bewurkje]

Búste yn de Lubentiuskapel

Lubentiuskapelle[bewurkje seksje | boarne bewurkje]

Yn de westlike muorre fan it noardlike sydskip is de yngong nei de Lubentiuskapel. Under it alter is in stiennen sarkofaach, wêryn't nei alle gedachten yn de 9e iuw it bonkerak fan de hillige Lubentius ((berne ± 300; ferstoarn ± 370 yn Kobern) nei Dietkirchen brocht waard en wêryn't it ek no noch leit. Efter it moderne traaljewurk fan de alteropbou is in reliquarium yn de foarm fan in búste. Yn de holle fan de búste wurdt in part fan de skedel fan Lubentius bewarre. De holle fan de búste datearret út 1300, it ûnderste diel stamt út 1477.

Dreifaltigkeitskapelle[bewurkje seksje | boarne bewurkje]

De Kapel fan de Trijefâldichheid stiet oan de súdeastlike kant fan de tsjerke en waard om 1370 hinne boud. Efkes foar 1700 waard de kapel yn barokke styl feroare. Ut dy tiid stamt ek it tsjintwurdige alter. Efter it alter is in muorreskilderij dy de "Foarspraak fan Kristus foar it minskdom" as tema hat. Ienris yn de moanne wurdt hjir in protestânske tsjinst holden.

Michaelskapelle[bewurkje seksje | boarne bewurkje]

De Michaëlskapel stiet oan de noardeastlike kant fan de tsjerke. De kapel waard koart foar it jier 1000 boud. Under de kapel leit in ossuarium. It alter fan de kapel is neogoatysk en toant de aartsingel Michaël as oerwinner fan de duvel. Yn it easten is in lyste apsis, dy't earder tichtmitsele wie en yn 1958 iepenbrutsen waard. Hjirby kamen resten fan midsiuwske muorreskilderingen oan it ljocht.

Bysûnderheden[bewurkje seksje | boarne bewurkje]

  • Op har reis troch Europa yn 1985 die Mem Teresa de tsjerke oan om te bidden by it grêf fan Lubentius.
  • Yn it ramt fan in ûndersyk troch de omrop fan de Hessischen Rundfunk waard de tsjerke troch it publyk op it tsiende plak fan de moaiste tsjerke fan Hessen keazen.

Keppeling om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Dizze side is alhiel of foar in part in oersetting fan de Dútske Wikipedyside; sjoch foar de bewurkingsskiednis: [1]