Fêreu-eilannen

Føroyar
Færøer

Flagge Wapen
Offisjele taal	Fêreusk en Deensk
Haadstêd	Tórshavn (Deensk: Thorshavn)
Steatsfoarm	autonoom lân binnen it Deenske Keninkryk
Gebiet % wetter	1.399 km² 0,5­%
Ynwenners (2013)	49.709
Munt	Fêreuske kroan (DKK)
Tiidsône	UTC +0
Lânkoade	FO
Ynternet	.fo
Tillefoan	+298

It Tinganes, yn Tórshavn, de sit fan it Fêreuske regear.

De Fêreu-eilannen (Fêreusk: Føroyar [ˈfœɹjaɹ]^?; Deensk: Færøer [ˈfɛːʀøʔəʀ]^?) binne in eilannegroep yn 'e noardlike Atlantyske Oseaan, tusken Skotlân, Noarwegen en Yslân yn. De eilannen foarmje in autonoom lân ûnder de Deenske Kroan, wat sizze wol dat se folslein selsbestjoerend binne, útsein op 'e mêden fan definsje en bûtenlânske saken, dy't noch altiten ûnder it foech fan it regear fan it memmelân Denemark falle. (It is in identike relaasje as dy't Nederlân hat mei Arûba, Kurasao en Sint-Marten.) Der wenje krapoan 50.000 minsken (2013) op 'e Fêreu-eilannen, en de haadstêd is Tórshavn (Deensk: Thorshavn). It Fêreusk, de nasjonale taal, is nauwer besibbe oan it Yslânsk en de Westnoarske dialekten as oan it Deensk.

De Fêreu-eilannen waarden fan de njoggende iuw ôf fal út Noarwegen wei kolonisearre. Yn de alfde iuw kamen de eilannen oan 'e Noarske kening. Doe't Noarwegen letter sels yn Deenske hannen foel, kamen de Fêreu-eilannen ek ûnder Deensk bestjoer. Dat is sa bleaun, ek nei't Noarwegen yn 1815 by Sweden kaam te hearren en yn 1905 selsstannich waard. Yn 1948 krigen de Fêreu-eilannen selsbestjoer. Hja hawwe der foar keazen om bûten de Jeropeeske Uny te bliuwen.

Der binne seekaarten út de sechstjinde en santjinde iuw mei de Fêreu-eilannen as ien grut eilân mei de namme Frislân, men hat noch gjin ferbân lizze kind mei de namme "Fryslân".

Geografy

De heechste berch fan de eilannegroep is Slættaratindur mei 882 meter. Der binne 18 eilannen dêr't 17 fan bewenne binne. It grutste eilân, Streymoy, is mei in brêge ferbûn mei it op ien nei grutste eilân, Eysturoy.

Kaart fan 'e Fêreu-eilannen.

De 17 bewenne eilannen binne:

Streymoy Eysturoy Vágar Mykines Suðuroy Stóra Dímun

Skúvoy Sandoy Hestur Koltur Nólsoy Borðoy

Kalsoy Kunoy Viðoy Svínoy Fugloy

It achttjinde, ûnbewenne eilân is Lítla Dímun.

Demografy

Der wenje likernôch 48.000 minsken op 'e ûnderskate eilannen. De measte minsken, sa'n 92%, komme fan 'e Fêreu-eilannen sels. Oare groepen binne Denen, Yslanners en Grienlanners. Noaren en Poalen binne der ek op 'e eilannen. Sa'n 44.000 minsken op de eilannen prate it Fêreusk, en de op ien nei grutste taal is it Deensk.