Emily Ratajkowski

Ut Wikipedy
Jump to navigation Jump to search
Emily Ratajkowski
High-contrast-camera-photo.svg model
Emily Ratajkowski op 'e cover fan 'e edysje fan maart 2012 fan it tydskrift Treats!.
Emily Ratajkowski op 'e cover fan 'e edysje fan
maart 2012 fan it tydskrift Treats!.
persoanlike bysûnderheden
echte namme Emily Ratajkowski
nasjonaliteit Flag of the United States.svg Amerikaansk
berne 7 juny 1991
berteplak Londen (Grut-Brittanje)
etnisiteit Flag of Germany.svg Dútsk
Flag of Ireland.svg Iersk
Flag of Israel.svg Joadsk
Flag of Poland.svg Poalsk
wurkpaad
soarte model fotomodel, mannekên,
neakenmodel
jierren aktyf 2009 – no
offisjele webside
www.emrata.com

Emily Ratajkowski (útspr.: [rɑ:taɪ'koʊski], "rataikouski"; Londen, 7 juny 1991) is in Amerikaansk model en aktrise fan mingd etnysk komôf. Hja krige yn 2013 bekendheid en waard ferheft ta sekssymboal troch har (topless) optreden yn 'e fideoklip fan it nûmer Blurred Lines, fan 'e Amerikaanske sjonger Robin Thicke.

Libben[bewurkje seksje | boarne bewurkje]

Jonkheid en komôf[bewurkje seksje | boarne bewurkje]

Ratajkowski waard yn 1991 yn 'e Britske haadstêd Londen berne út Amerikaanske âlden dy't op dat stuit (noch) net troud wiene. Har heit is de roomske keunstskilder en tekenlearaar John David "J.D." Ratajkowski, dy't fan Poalsk en Iersk komôf is, en har mem is Kathleen Balgley, in joadske perfester Ingelske taal- en letterkunde mei Iersk, Dútsk en Poalsk-Joadsk bloed.

Doe't Ratajkowski fiif jier wie, ferfear it gesin nei it Kalifornyske San Diego, en se brocht har fierdere jonkheid troch yn Encinitas, in foarstêd fan San Diego, wylst it gesin frijwol eltse simmer yn Jeropa op fakânsje gie, benammen yn Ierlân en op Majorka. Ratajkowski groeide op sûnder tillefyzje, en die yn har frije tiid oan fuotbal, amateurtoaniel en ballet. Troch har heite wurk as keunstskilder en tekenlearaar rekke se al jong fertroud mei neakenskilderijen, neakenfotografy en neakenmodellen. Fierders wiene sy en har mem op it strân fan Majorka eltse simmer topless oan it sinnebaaien, wat yn 'e Feriene Steaten noch altyd not done is.

Karriêre[bewurkje seksje | boarne bewurkje]

Nei't se yn 2009 in jier oan 'e Universiteit fan Kalifornje, Los Angeles (UCLA) studearre hie, besleat Ratajkowski in karriêre as model nei te stribjen. Se modellearre yn 't earstoan fral baaiklean en linzjery, mar krige erkenning as mannekên nei't se by in pear reklamekampanjes mei fotograaf Tony Duran wurke hie. Dêrnjonken die se ek keunstsinnige en eroatyske neakenreportaazjes foar ferskate tydskriften, wêrûnder ien foar it blêd Treat!, dêr't se op 'e cover kaam te stean. It wie dy omslachfoto dy't derta late dat se frege waard foar de fideoklip fan it nûmer Blurred Lines, fan sjonger Robin Thicke.

Feitliks hie Ratajkowski earst gjin belangstelling foar dat optreden, mei't se koart dêrfoar ek al yn twa oare fideoklips te sjen west hie, en se bang wie om it label "fideoklipmodel" opspjelde te krijen. De regisseur fan 'e klip, Diane Martel, wist har lykwols te bepraten, en sa koe it dat Ratajkowski yn 'e spraakmeitsjende klip mei twa oare modellen (Jessi M'Bengue en Elle Evans) topless omdûnset wylst Thicke syn lietsje sjongt (der bestiet ek in "oanklaaide" of sinsurearre ferzje foar de kekene Amerikaanske merk). Nettsjinsteande de te ferwachtsjen krityk fan feministen en kristen-fûnemintalisten (of miskien wol krekt dêrtroch) waard it nûmer in geweldich súkses, dat yn 14 lannen it earste plak op 'e hitlisten helle (wêrûnder de Feriene Steaten, Grut-Brittanje, Kanada en Nederlân).

Ratajkowski fûn alle oandacht dy't útgie nei de neakenens fan 'e modellen yn 'e klip mar nuver. Se sei dat it foar har dúdlik wie dat soks oanjoech dat de Amerikaanske kultuer net sa'n protte foarútgong makke hie as men ferwachte hawwe soe. Neffens har wurdt yn 'e hjoeddeiske (Amerikaanske) maatskippij seksualiteit ûnderdrukt, wat in ferkearde saak is foar beide geslachten.

Har bekendheid fanwegen Blurred Lines wist Ratajkowski om te setten yn in súksesfolle modellekarriêre, mei ûnder mear in baaikleanreportaazje yn it toanoanjaande Amerikaanske sporttydskrift Sports Illustrated en eroatyske reportaazjes yn 'e manljusblêden FHM en Maxim. Dêrnjonken is se no ek wurksum as aktrise. Foartiid ambiëarre Ratajkowski ek al in aktearkarriêre, mar doe waard se inkeld cast yn roltsjes as "it gemiene fanke" of "de cheerleader", dy't har net de muoite wurdich wiene. Yn 2009 en 2010 ferskynde se twa kear yn in ôflevering fan 'e bernesearje iCarly, in optreden dat se beskôge as har iennichste wiere aktearwurk. Nei Blurred Lines koe se har aktearkarriêre lykwols ynienen wol fan 'e grûn krije, en sûnt hie se rollen yn 'e films Gone Girl (mei Ben Affleck) út 2014, Entourage (as harsels), út 2015, en We Are Your Friends (mei Zac Efron), ek út 2015.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.