Dûkelmantsje

dûkelmantsje
taksonomy
ryk	dieren (Animalia)
stamme	rêchstringdieren (Chordata)
klasse	fûgels (Aves)
skift	wilstereftigen (Charadriiformes)
famylje	wilsterfûgels (Charadriidae)
skaai	dûkelmantsjes (Anarhynchus)
soarte
Anarhynchus alexandrinus
	Linnaeus, 1758
	IUCN-status: net bedrige
ferspriedingsgebiet
	stânfûgel ; simmerfûgel wintergast; dwaalgast ;

It dûkelmantsje (Anarhynchus alexandrinus, synonym Charadrius alexandrinus) is in wilsterfûgel út it skaai fan 'e dûkelmantsjes.

Foarkommen

De boppekant fan in dûkelmantsje is brúngriis en de ûnderkant is wyt. It dûkelmantsje hat in swarte eachstreek en by de hals hat de fûgel donkere streken. De fûgel hat swarte skonken en ek in koarte swarte snaffel. In folwoeksen dûkelmantsje is tusken de 15 en 20 sm grut en hat in wjukspanwiidte fan 35 oant 45 sm. De fûgel waacht tusken de 30 en 55 gram.
Yn de simmer hat it mantsje in ljochtbrune krún.

Fersprieding

It dûkelmantsje is in echte kustfûgel, hy is net yn it binnenlân te finen. Hy briedt meast op sân- of grintstrannen oan 'e Noardsee, Atlantyske Oseaan, de Middellânske See, Swarte See en Kaspyske See. It is in trekfûgel dy't oan súdliker kusten oerwinteret.

Fuortplanting

It dûkelmantsje komt yn april yn syn briedgebiet. It nêst is in kûltsje yn 'e grûn, wêryn't it wyfke trije aaiten leit. Nei fjouwer wiken brieden komme de jonge fûgels út it aai en ferlitte fuort it nêst. Ein augustus, begjin septimber geane de fûgels wer op reis nei harren oerwinteringsgebiet.