Broer Doekeles Dykstra

	Broer Doekeles Dykstra
	persoanlike bysûnderheden
echte namme	Broer Doekeles Dykstra
oare namme	B.D. Dykstra
nasjonaliteit	Nederlânsk ; Amerikaansk
berne	21 novimber 1871
berteplak	Penjum (Fryslân)
stoarn	29 maart 1955
stjerplak	Orange City (Iowa)
etnisiteit	Frysk
	wurkpaad
berop/amt	útjouwer, sjoernalist
aktyf as	predikant, ûnderwizer, ; dichter, publisist
jierren aktyf	±1891 – 1955
reden ; bekendheid	tige aktyf yn 'e Nederlânske; ymmigrantemienskip
bekendste ; wurk(en)	Ten Eeuwigen Vrede ; Geloof en Leven

Broer Doekeles Dykstra (yn Amearika fral bekend as B.D. Dykstra; Penjum, 21 novimber 1871 - Orange City (Iowa), 29 maart 1955) wie in Frysk-Amerikaansk útjouwer, sjoernalist, predikant, ûnderwiisman, dichter en publisist. Hy skreau ferskate boeken, en wie tige aktyf mank de Nederlânske ymmigrantemienskip yn 'e Feriene Steaten.

Libben

Dykstra waard yn 1871 berne yn Penjum, as de soan fan Doekele Dykstra (1816-1891) en Beitske van der Schaaf (1840-1928). Hy hie twa bruorren en trije susters: Sarah (1863-1933), Reinder (1868-1941), Simon (1869-1891), Dora (1873-1900) en Agnes (1878-1954). De húshâlding emigrearre yn 1882 nei de Feriene Steaten, en sette him dêr nei wenjen yn in krite fan 'e steat Iowa dêr't in protte Nederlânske ymmigranten har fêstige hiene.

Dykstra ûntjoech him yn Amearika ta in warber pasifist. Ein 19e iuw wied er studint oan 'e Orange City Academy (no it Northwestern College) yn Orange City, in skoalle dy't noch altyd de Dykstra-Muste-Nelson Fredesstúdzjebeurs oanbiedt ta eare fan him, A.J. Muste en Ronald R. Nelson. Yn 1896 studearre er ôf oan it Hope Kolleezje, yn Holland, yn 'e steat Michigan.

Letter runde Dykstra mei syn soannen in lytse útjouwerij, en wied er redakteur fan it ymmigranteblêd de Volkskrant. Dêrnjonken wied er as predikant aktyf yn 'e Herfoarme Tsjerke yn Amearika, en yn dy fermiddens stied er bekend as "de man op 'e fyts". Dykstra skreau sels ek ferskate boeken (yn it Nederlânsk) oer religieuze ûnderwerpen, en teffens publisearre er de dichtbondel Korte Gedichten. Hy gie sels op 'e fyts by de doarren lâns om dy boeken oan 'e man te bringen.

Ferskate soannen fan him waarden letter foaroansteande ûnderwizers en teologen. Sa wie D. Ivan Dykstra heechlearaar filosofy op it Hope Kolleezje, hie Wesley C. Dykstra deselde funksje oan it Alma Kolleezje en waard Vergil Dykstra presidint-direkteur fan 'e George Mason Universiteit. Broer Doekeles Dykstra stoar yn 1955 yn Orange City, doe't er 83 jier âld wie.

Neiteam

Broer Doekeles Dykstra troude op 8 jannewaris 1909 yn Sioux Center mei Nellie Schippers (1890-1975) út Pella, dy't ek fan Nederlânsk (mooglik Frysk) komôf wie. Hja krigen tsien bern:

Clemens Aquila Dykstra, stoarn as in poppe fan 4 moannen
Betsche Dykstra, troud mei Marion Schippers út Pella (Iowa)
dû. Adelphos A. Dykstra, predikant te Rock Valley (Iowa)
Ava Dykstra, troud mei Dwight Berkible út Los Angeles
dû. D. Ivan Dykstra, heechlearaar filosofy oan it Hope Kolleezje yn Holland (Michigan)
dû. Anthony P. Dykstra, predikant te Interlaken (New York)
Reinard H. Dykstra, wenjend te Sioux Center (Iowa)
dû. Wesley C. Dykstra, heechlearaar filosofy oan it Muskingum Kolleezje yn New Concord (Ohio) en letter oan it Alma Kolleezje yn Alma (Michigan)
dr. Vergil H. Dykstra, heechlearaar filosofy oan 'e Universiteit fan Oregon yn Eugene en letter presidint-direkteur fan 'e George Mason Universiteit yn Fairfax (Firginia)
E. David Dykstra, dosint oan 'e Universiteit fan Iowa yn Iowa City (Iowa)

Wurk

1937 – Ten Eeuwigen Vrede
1939 – Door Californië per Fiets in 1936
1941 – Geloof en Leven
19?? – Korte Gedichten

Keppeling om utens

(in) Biografy fan Broer Doekeles Dykstra op FindaGrave.com
(in) Northwestern College
(in) Joint Archives of Holland
(in) goDutch.com

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: External links, op dizze side.