Rangoon

	Rangoon
	Súd Rangoon
	Bestjoer
Lân	Myanmar
	Sifers
Ynwennertal	4 348 000 (2010)
Oerflak	598,75 km²
Befolkingsticht.	7261,8 / km²
Hichte	15 m
	Oar
Stifting	6e iuw
Tiidsône	(UTC+6.30)
	Offisjele webside
	www.yangoncity.com.mm

Rangoon (Birmaansk: Yangon) is de grutste stêd fan Myanmar (Birma) en oant 7 novimber 2005 de haadstêd fan Myanmar. De stêd hie yn 1983 2.458.712 ynwenners. Yn 2005 waard it ynwennertal rûsd op 4.082.000. De stêd leit oan de rivier Rangoon, net fier fan de kust fan de Golf fan Martaban. Wichtige hannelsprodukten binne: rys, teakhout, ierdoalje, katoen en metaalertsen. De yndustry fan de stêd bestiet út rysmûnen, seachmoles, oaljeraffinaderijen, en stiel-, izer- en koperranerijen.

Ut de skiednis

Der wurdt oanaam dat de stêd yn de 6e iuw stichte is as Dagon troch de Mons, dy't it doetiids foar it sizzen hienen yn Beneden-Birma. Rangoon wie lykwols noch mar in fiskersdoarp by de Swedagonpagoade doe't Kening Alaungapaya yn 1753 der syn haadstêd fan makke. De Britten oermastere Rangoon en hiel Under-Birma yn de Twadde Anglo-Burmeeske Kriich yn 1852. Sy makken de stêd ta de wichtichste fan it lân. Rangoon waard de haadstêd fan hiel Britsk-Birma nei de ferôvering fan Boppe-Birma yn de Tredde Aglo-Birmeeske Kriich fan 1885. Yn de iere 20e iuw wie it in stêd mei allerhanne iepenbiere foarsjenning wurden en mei in ynfrastruktuer dy't fergelike wurde koe mei dy fan Londen.

Trije lanlike stakings tsjin it Britske Ryk setten útein yn Rangoon, dat wie yn 1920, 1936 en 1938. de stêd rekke yn 1930 swier skansearre troch in ierdskodding in dêrnei folgjende tsûnamy. Ek yn de Twadde Wrâldkriich waard dêr in protte fernield. De stêd waard 8 maart 1942 troch de Japanners ynnaam.

De Universiteit fan Rangoon waard 1920 troch de Britten stichte en yn 1964 op 'en nij organisearre. Yn deselde snuorje waard it Rangoon General Hospital iepene.

Rangoon waard haadstêd fan de Uny fan Birma op 4 jannewaris 1948 doe't it lân ûnôfhinklik fan it Britske Ryk waard.