Urban fantasy

Ut Wikipedy
Jump to navigation Jump to search

Urban Fantasy, wat oerset wurde kin as "stedsfantasij", is subsjenre fan 'e fantasy, wêrfan't de definysje bepaald wurdt troch it toaniel fan hanneling: it ferhaal moat him foar it meastepart yn in stêd ôfspylje. Dêrby spilet it yn 'e regel yn ús kontemporêne wrâld, dêr't de skriuwer dan fantasy-eleminten lykas boppenatuerlike wêzens en/of tsjoenderij yn yntrodusearret. Wat dat oangiet is urban fantasy it tsjinstelde fan high fantasy, dat hielendal plakfynt yn in alternative wrâld dy't folslein oan it brein fan 'e skriuwer ûntspruten is. It is lykwols ek mooglik dat urban fantasy yn in histoaryske, futuristyske of fiktive setting pleatst is, salang't it him mar grutdiels yn in stêd ôfspilet.

In protte urban fantasy-romans hawwe as fertelperspektyf de ik-persoan, en geane gauris oer haadpersoanen dy't yn in stêd as in figilante of út namme fan in alternatyf gesach de wet hanthavenje op it boppenatuerlik mêd. Sa giet de Anita Blake-searje fan Laurell K. Hamilton oer de ûndersiken fan in boppenatuerlike federaal marshal dy't paranormale saken oplost, en giet The Dresden Files fan Jim Butcher oer in tsjoender dy't foar in diel op eigen manneboet en foar in diel út namme fan in ynternasjonale Wite Rie fan Tsjoenderij syn thússtêd Chicago frijwarret fan boppenatuerlike smjunten. Oare foarbylden fan urban fantasy binne de Mercy Thompson- en Alpha and Omega-searjes fan Patricia Briggs en de Kate Daniels-rige fan Ilona Andrews.

Op 'e tillefyzje wie ien fan 'e bekendste urban fantasy-searjes Buffy the Vampire Slayer, oer in skoalfamke dat yn har frije tiid it (fiktive) stedsje Sunnyvale, yn Kalifornje, beskerme tsjin fampieren en oare kweadoggers.

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: Notes en References, op dizze side.