Sompereager

Sompereager
Sompereager yn briedkleed
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift pilekaaneftigen (Pelecaniformes) famylje reagerfûgels (Ardeidae) skaai sompereagers (Ardeola)
soarte
Ardeola ralloides
Scopoli, 1769
IUCN-status: net bedrige
ferspriedingsgebiet
stânfûgel      simmerfûgel      wintergast

De sompereager, ek brune reager (Ardeola ralloides), is in fûgel út de famylje fan 'e reagerfûgels.

Ferskining

De sompereager is in lytse, knobske reager dy't bekend stiet om syn opfallende feroaring as er de loft yn giet. Op 'e grûn sjocht de fûgel der brúngielich út, mar yn 'e flecht is de fûgel foar in grut part wyt. It is in lytse reagersoarte fan likernôch 42 oant 47 sm lang. De fûgel hat in koarte, tsjokke nekke en in stevige snaffel. Yn 'e rêst is er oer it generaal striekleurich oant ljochtbrún. De mantel is brún en de nekke is by net-briedende fûgels donker streke. As de fûgel de wjukken nimt falle de sniewite wjukken, sturt en stút op, itjinge kontrastearet mei it brune lichem.

Yn 'e briedttid kriget de fûgel lange giel mei swarte sierfearren op 'e kop dy't oer de rêch hingje. De rêch wurdt mear goudbrún en de snaffel wurdt blau mei in swarte punt. De poaten kinne yn 'e peartiid foar in koart skoft fel read wurde. Nei de briedtiid wurde de fearren wer doffer, de sierfearren koarter en de snaffelbasis meast gielich.

Bûten briedtiid	Briedkleed

Fersprieding

De fûgel komt foar yn 'e súdlike helte fan Europa, it Midden-Easten en grutte dielen fan Afrika. Yn Europa libbet de fûgel yn Spanje, Súd-Frankryk, Itaalje en de Balkan en om 'e Swarte- en Kaspyske See. Yn Nederlân is de fûgel in seldsume gast. Alhoewol't de fûgel oant likernôch 1880 yn Nederlân briede, wurdt er hjoed-de-dei allinnich noch yn lytse oantallen as dwaalgast sjoen. De measte waarnimmingen binne yn 'e maitiid en simmer as guon fûgels by it lûken te fier nei it noarden trochfleane. Bekende plakken yn Fryslân dêr't de sompereager wolris opdûkt binne bygelyks de Lauwersmar en de polders fan Súdwest-Fryslân.

De fûgel hâldt fan rêstige swietwettergebieten mei in soad begroeiïng, lykas sompen, rivierdelta's en marren mei reid en strûken.

Hâlden en dragen

Sompereagers binne skrutene fûgels, dy't tusken it reid goed yn 'e omjouwing opgeane. It briedseizoen rint yn Europa fan april oant july. Syn nêst is in platfoarm fan tûken en reid yn lege beammen, strûken of ticht reid, faak flak boppe it wetter. It wyfke leit meastentiids 4 oant 6 eieren (yn Afrika faak minder, sa'n 2 oant 3). De aaien binne ljocht grienblau fan kleur en net glânzjend. Beide âlden briede op 'e aaien en de piken kommen nei 22 oant 24 dagen út. Al nei twa wiken ferlitte de jongen it nêst om op tûken yn 'e omjouwing te klauterjen, mar se fleane pas nei likernôch 45 dagen.

De noardlike populaasje fan Europa en West-Aazje binne trekfûgel.

Status

Op 'e Reade list fan 'e IUCN hat de fûgel de status fan net bedrige (Least Concern, 2018). Yn guon gebieten nimme de oantallen ôf troch habitatferlies as gefolch fan it drûchlizzen fan sompen. Yn Europa binne de briedpopulaasjes fragmintearre. De grutste populaasjes sitte yn it easten (Ruslân, Turkije, Roemeenje), mar ek dêr is in delgong waarnommen. Yn it Soanje, Frankryk en Itaalje binne troch goede beskerming fan 'e natuergebieten de oantallen wer tanommen en de soarte wreidet syn ferspriedingsgebiet stadichoan nei it noarden ta út. De Europeeske populaasje wurdt tusken 14.300 oant 26.800 pearkes rûsd.

Fleanende fûgel	Aaien

Sjoch ek

• feereager
• lytse wite reager

Boarnen, noaten en/as referinsjes:

BirdLife, oproppen 13 febrewaris 2026. Birds of the World, oproppen 12 febrewaris 2026. Sovon, oproppen 13 febrewaris 2026. Fûgelbeskerming, oproppen, 13 febrewaris 2026. Commons Wikimedia Commons  Ofbylden dy't by dit ûnderwerp hearre, binne te finen yn de kategory Sompereager fan Wikimedia Commons.