Oosterkerk (Grins)

Ut Wikipedy
Springe nei navigaasje Springe nei sykjen
Oosterkerk
Eastertsjerke (grifformeard-frijmakke tsjerke), Grins.jpg
lokaasje
lân Flag of the Netherlands.svg Nederlân
provinsje Flag of Groningen.svg Grinslân
plak Groningen stad wapen.svg Grins
adres E. Thomassen à Thuessinkloane 1
bysûnderheden
type bouwurk Tsjerke
boujier 1927-1929
arsjitekt J. Kuiler en L. Drewes
boustyl Ekspresjonisme
monumintale status ryksmonumint
monumintnûmer 483654
webside Side fan de gemeente

De Oosterkerk (Eastertsjerke) is in monumintale tsjerke yn Grins. De tsjerke wurdt brûkt troch de grifformeard-frijmakke gemeente en jout plak oan mear as 1100 minsken.

Skiednis[bewurkje seksje | boarne bewurkje]

De tsjerke waard tagelyk mei in pastory en kosterswente yn de jierren 1927-1929 op de hoeke fan de S.S. Rosensteinloane en de Thomassen à Thuessinkloane boud foar de grifformearde gemeente fan de eastlike stedsútwreiding fan Grins. De arsjitekten Jan Kuiler en Lucas Drewes ûntwurpen in tsjerke yn de styl fan de Amsterdamske Skoalle en dêr't plak wie foar mear as 1100 minsken (wêrfan 336 op de kreake).

Tsjerke, kosterswente en pastory steane op in mearhoekich, waaierfoarmich grûnplan, mei de haadyngong op de hoeke fan de beide loanen oan de râne fan de Easterparkwyk. Yn 1990 waarden de glês-yn-leadramen restaurearre. Sûnt 1995 is de tsjerke ynskreaun as ryksmonumint.[1]

Gebrûk[bewurkje seksje | boarne bewurkje]

Tusken 1999 en 2002 dielden de grifformearden de tsjerke mei de frijmakke-grifformearden. Op 1 juny 2002 foarmen de Grifformearde tsjerken fan Grins-Noard en Grins-Súd ien Grifformearde Stedstsjerke. Noch yn deselde moanne holden de grifformearden foar it lêst in tsjinst yn de tsjerke. De frijmakken bliuwe lykwols de tsjerke fierder brûken.[2]

Oargel[bewurkje seksje | boarne bewurkje]

Yn itselde jier fan de foltôging fan de grifformearde tsjerke boude de firma Valckx & Van Kouteren út Rotterdam boppe de preekstoel in pneumatysk oargel. Yn de jierren 1960 en 1970 waard de disposysje fan it ynstrumint feroare en de traktuer elektrifisearre. Yn 2008 brocht Mense Ruiter tagelyk mein in restauraasje it oargel werom yn de oarspronklike steat.[3]

Boarnen, noaten en referinsjes[boarne bewurkje]

Boarnen, noaten en/as referinsjes:

Keppeling om utens