Middenbeemster

Middenbeemster
Polityk
Lân	Nederlân
provinsje	Noard-Hollân
gemeente	Purmerein
Sifers
Ynwennertal	5.570 (1 jannewaris 2023)
Oerflak	21,18 km², wêrfan: - lân: 20,89 km² - wetter: 0,29 km²
Befolkingsticht.	263 ynw./km²
Oar
Tiidsône	UTC +1
Simmertiid	UTC +2
Koördinaten	52° 33' NB, 4° 55' EL
Offisjele webside
https://beets.nl/
Kaart
Kaart
Lokaasje fan Middenbeemster (grien) yn de eardere gemeente Beemster

Middenbeemster is in doarp yn de gemeente Purmerein yn de Nederlânske provinsje Noard-Hollân. It doarp leit yn it midden fan de Beemsterpolder en wie foar 1 jannewaris 2022 it haadplak fan de doe ophefte gemeente Beemster. Yn de himrik fan Middenbeemster falle de buorskippen Oostbeemster en Zuidbeemster.

Middenbeemster hat 5.570 ynwenners (1 jannewaris 2023).

Geografy

Sa't de namme al seit leit Middenbeemster yn it midden fan de Beemsterpolder. Nei't de polder drûchlein waard, waard er systematysk ferkavele en de doe ûntstiene delsettings systematysk neamd nei de lizzing dêrfan.

Skiednis

Middenbeemster is it âldste doarp fan de Beemster. Mei it oanlizzen fan in rjochthoekich plein yn 1610 en de bou fan de tsjerke yn 1623 oan dat plein, ûntstie dêr al rillegau in buorren dy't grutter wie as de measte buerten yn de Beemster dy't nei it drûchmeitsjen ûntstien wiene. It plein waard oanlein yn de midkavel fan de Beemster, dêr't de plaknamme dan ek fan ôflaat is. De tsjerke, Keyser- of Beemstertsjerke, waard troch de stedsarsjitekt fan Amsterdam, Hendrick de Keyser, ûntwurpen.

Middenbeemster woeks om it plein en de tsjerke hinne ta it sintrum fan de Beemster. Op it plein waard al gau in feemerk holden. Oan de rânen waard in hearehûs, in weeshûs en in skoalle boud. Net fier dêr wei waard de nôtmûne De Nachtegaal boud. Middenbeemster bleau de wichtichste kearn fan de Beemster. Hoewol't it doarp him yn de twadde helte fan de 20e iuw útwreide, waard it rjochthoekige patroan net loslitten. Alle lettere útwreidings waarden neffens dat patroan boud. Oan alle taheakke buerten is te sjen út hokker tiidrek dy komme en hokker wenferlet dêr wie, fan rychjehûzen oant frijsteande wenten mei sleatten en lytse grêften tusken de hûzen troch.

Monuminten

Middenbeemster hat in stikmannich ryksmonuminten, lykas de herfoarme tsjerke, de nôtmûne De Nachtegaal, guon hearehuzen en monumintale stjelppleatsen. Yn in monumintale stjelp fan 1877 is it Agrarysk Museum Westerhem fêstige

Ofbylden

• 
  Herfoarme tsjerke
• 
  It plein yn Middenbeemster
• 
  De Nachtegaal

Ferneamde ynwenners

• Carel Fabritius (1622-1654), skilder
• Francien de Zeeuw (1922-2015), Nederlânsk fersetsstrider yn de Twadde Wrâldkriich

Keppeling om utens

• Histoarysk Selskip Middenbeemster

Boarnen, noaten en referinsjes

Boarnen, noaten en/as referinsjes:

Noaten Boarnen Middenbeemster yn Plaatsengids

Ofbylden dy't by dit ûnderwerp hearre, binne te finen yn de kategory Middenbeemster fan Wikimedia Commons.