Eastertsjerke (Ljouwert)

	Eastertsjerke
	Lokaasje
lân	Nederlân
provinsje	Fryslân
plak	Ljouwert
adres	Hoeksterpaad
koördinaten	53°12' N 5°48' E
	Tsjerklike gegevens
tsjerkegenoatskip	Grifformeard-synodaal
ôfstjitten	1979
	Arsjitektuer
arsjitekt	Tjeerd Kuipers
boujier	1910
sloopjier	1985
	Kaart
	;

De Eastertsjerke oan it Hoeksterpaad wie in grifformeard tsjerkegebou yn 'e stêd Ljouwert.

Skiednis

De Eastertsjerke waard neffens in ûntwerp fan 'e arsjitekt Tjeerd Kuipers boud. Op 27 juny 1910 waard troch âlderling G.J. Brugsma de earste stien lein. De nijbou ferfong in âlder tsjerkegebou út 1858 op itselde plak. Op 11 novimber koe de tsjerke mei 800 sitplakken yn gebrûk nommen wurde.

De tsjerke hie in yngong oan it Hoeksterpaad en oan it Hoekstertsjerkhôf. Fierder hie de tsjerke in kosterswente en in konsistoarjekeamer. Yn itselde jier as de Eastertsjerke waard ek de Skrânstsjerke yn Huzum iepene.^[1]^[2]

Troch it sakjende oantal leden en de ûntfolking fan 'e Ljouwerter binnenstêd waard de tsjerke sletten. Foar it lêst waard op 28 oktober 1979 in tsjinst holden. Nei it sluten fan 'e Eastertsjerke hold de Grifformearde tsjerke fan Ljouwert - net te betiizgjen mei Ljouwert-West en Ljouwert-Huzum - op dat stuit noch twa tsjerken oer: de Salvatortsjerke en de Koepeltsjerke.^[3]

Yn 1980 kocht de gemeente Ljouwert de tsjerke^[4] en yn septimber 1981 folge de ôfbraak fan 'e tsjerke. Sûnt 1983 waarden op it lege plak nije oanleunhûzen by it fersoargingshûs Nije Hoek boud, dy't yn 1985 yn gebrûk nommen waarden. Yn 'e muorre waard de stiftingsstien fan 'e tsjerke út 1858 ynmitsele. Hjoed-de-dei binne de apparteminten gjin oanleunhûzen mear en is it Nije Hoek gjin fersoargingshûs mear.

Oargel

De tsjerke hie in oargel fan Van Dam út 1864, dat troch de Grifformearde tsjerke-frijmakke yn Harns oankocht waard. Dêr waard it oargel yn 1989 opboud, mar mei't de tsjerke yn 2004 ôfbaarnde gie ek it oargel fan 'e Eastertsjerke ferlern.^[5]^[6]

Publikaasjes

C. van der Woude: Leeuwarder Oosterkerk (1980)

Boarnen, noaten en referinsjes

Boarnen, noaten en/as referinsjes:

Wikimedia Commons

Ofbylden dy't by dit ûnderwerp hearre, binne te finen yn de kategory Eastertsjerke, Ljouwert fan Wikimedia Commons.

[1] Ljouwerter Krante: De nieuwe kerk der Gereformeerden 7 novimber 1910).

[2] reformeerdekerken.info: De Leeuwarder kerksluitingskwestie 2008-2015.

[3] Ljouwerter Krante: Triest afscheid van Oosterkerk (29 oktober 1979)

[4] Ljouwerter Krante: Gemeente Leeuwarden koopt de Oosterkerk (10 juny 1980).

[5] Hiemside De Haven, ynformaasje + disposysje fan it ferbrânde oargel.

[6] Kerk en Orgel: ynformaasje oargel Eastertsjerke.

[1]

[2]

[3]

[4]

[5]

[6]