Bisdom Sées

	Bisdom Sées; Diocèse de Séez
	Lokaasje bisdom Sées (read).
	Basisgegevens
Tsjerkeprovinsje	Rouen
Biskopssit	Sées
Katedraal	Us Leaffrou fan Sées
Patroanhillige	Marije
Hiemside	www.orne.catholique.fr
	Skiednis
Oprjochting	5e iuw
	Hierargy
Biskop	Bruno Feillet
	Statistyk
Oerflak	6.103 km²
Befolking	279.755 (2020)
Wêrfan katolyk	260.430 (2020; 93,1%)
Parochy's	10 (2024)

It bisdom Sées (ek Séez, Latyn: Dioecesis Sagiensis; Frânsk: Diocèse de Sées) is in roomsk-katolyk bisdom yn Frankryk. De biskopssit is de stêd Sées. It bisdom is 6.103 km² grut en hâld de grinzen fan it departemint Orne oan. Sées is in suffragaan bisdom fan it aartsbisdom Rouen.

Yn 2022 telde it bisdom likernôch 261.000 katoliken op in ynwennertal fan 279.942. Dêrmei is 93,2% fan 'e befolking katolyk. It bisdom is sûnt 2024 ferdield yn 10 parochy's.^[1]

Skiednis

De earste biskop fan Sées soe Latuinus west ha, in Britske misjonaris dy't yn 'e fyfte iuw yn 'e krite evangelisearre. Hy boude de earste tsjerke yn Sées op it plak fan in eardere Romeinske timpel. Sûnt de 9e iuw wurdt Latuinus as hillige fereare.

De tsjerklike organisaasjestruktuer waard mei de ynfallen fan 'e Wytsings tusken de 9e en 10e iuw fersteurd.

Nei it Konkordaat fan 1801 waarden de grinzen fan it bisdom op 'e nij tekene om se tegearre mei de grinzen fan it departemint Orne gearfalle te litten. Dielen fan it âlde bisdom Lisieux waarden doe by Sées foege.

In reorganisaasje yn 'e jierren 1990 brocht it tal parochy's mei it each op de fierdergeande sekularisaasje en it preestertekoart werom fan 509 nei 33. By de lêste reorganisaasje fan 2024 waard it oantal parochy's noch fierder werom brocht nei 10.

Bekende hilligen út it bisdom binne Jean Eudes en Theresia fan Lisieux.