Slach by Noordhorn

Ut Wikipedy
Springe nei navigaasje Springe nei sykjen

De Slach by Noordhorn wie in fjochterij tusken Steatske en Spaanskgesinde troepen op 30 septimber 1581.

Oanrin[bewurkje seksje | boarne bewurkje]

De Steatske troepen wiene it foarôfgeande jier in swiere slach tabrocht, meidat George fan Lalaing, greve fan Rennenberg, fan Steatske kant nei de Spaanskgesinde kant oerrûn. Dat waard letter ek wol bekend ûnder de namme Ferried fan Rennenberg. Dêrtroch kamen ûnder mear de stêd Grins en de Ommelannen yn Spaanske hannen. Under lieding fan de Steatske oanfierder Diederik Sonoy waarden yn 1581 de Fryske stêden Sleat, De Lemmer en Dokkum werom ferovere troch de Steatske troepen. Yn de simmer fan 1581 ferstoar George fan Lalaing en waard de lieding fan de stêd Grins tydlik oerdroegen oan Johan Baptiste fan Taxis en dêrnei oan Francisco Verdugo. Verdugo wûn mei Maarten Schenck grutte stikken grûn en fêstige him yn Noordhorn.

Noordhorn wie in doarpke tusken it yn Steatske hannen wêzende Fryslân en it Spaanskgesinde Grinslân. Troch Fryske druk om de Spaanskgesinde troepen oan te fallen waard dêrom yn de hjerst fan 1581 in Steatsk leger nei Noordhorn stjoerd.

Ferrin[bewurkje seksje | boarne bewurkje]

Op 30 septimber 1581 troffen beide legers elkoar in eintsje bewesten it plak Noordhorn. Ynearsten like de striid yn it foardiel fan de Steatsen te fallen, mar dêrnei sette Verdugo kanonnen yn. Beide kanten ferlearen in soad soldaten yn de fjochterijen, mar de Spaanskgesinden krigen de oerhân en sloegen de Steatske troepen werom. De Steatske oanfierders Sonoy en Willem Loadewyk fan Nassau-Dillenburg moasten har fjochtsjendewei weromlûke. Fan Nassau-Dillenburg waard yn de slach meardere kearen rekke troch kûgels, mar dy ketsten op syn harnas ôf. De Spaanskgesinden wûnen de slach.

Verdugo luts him nei de slach werom nei Grijpskerk, mar waard dêr ferdreaun meidat Steatskgesinde troepen in dyk trochstutsen.

Spoaren[bewurkje seksje | boarne bewurkje]

It gebiet by Noordhorn dêr't de slach levere waard, wurdt noch altiten oantsjutten as Norritsfjld, ferneamd nei de Steatske oerste John Norreys.

Boarnen, noaten en referinsjes[boarne bewurkje]

Boarnen, noaten en/as referinsjes: