Schwabenheim an der Selz

	Schwabenheim an der Selz
	Emblemen
	Bestjoer
Lân	Dútslân
dielsteat	Rynlân-Palts
lânkring	Mainz-Bingen
ferbânsgemeente	Gau-Algesheim
	Sifers
Ynwennertal	2.589 (2022)
Oerflak	9,49 km²
Hichte	140 meter boppe seenivo
	Oar
Postkoade	55270
Koördinaten	49° 55' N 8° 5' E
	Offisjele webside
	schwabenheim.com
	Kaart
	;

Schwabenheim an der Selz is in wyndoarp yn 'e lânkring Mainz-Bingen yn 'e Dútske dielsteat Rynlân-Palts. Schwabenheim an der Selz is mei de stêd Gau-Algesheim ien fan 'e sân Ortsgemeinden fan 'e ferbânsgemeente Gau-Algesheim.

Geografy

Schwabenheim leit net fier fan 'e eastlike igge fan 'e Selz op 'e helling fan 'e 249,1 m hege Mainzer berch. It doarp leit himelsbreed goed 15 km súdwest fan it sintrum fan Mainz.

By Schwabenheim hearre ek de delsettings Ferdinandhof en Nature Life Ranch en twa saneamde Aussiedlerhöfe (pleatsen bûten it doarp).

Skiednis

Neffens argeologyske fynsten waard it doarpsgebiet al om 600 f.Kr. bewenne. Ek is it dúdlik dat der Romeinske bewenning west hat.

Under it bewâld fan 'e karfoarsten fan 'e Palts waard yn 1556 de reformaasje ek yn Schwabenheim ynfierd. Dêrnei wiksele Schwabenheim tusken de lutherske, grifformearde en de katolike lear mar leafst njoggen kear fan leauwe. Yn 1705 waard it doarp yn it ramt fan 'e grutte Paltske tsjerkedieling lang om let yn 'e grifformearde en katolike tsjerke opdield.

Sûnt de 16e iuw bestie der ek in joadske mienskip yn Schwabenheim, dy't in synagoge hie oan 'e Bachstraße 4 en by de opheffing fan 'e mienskip yn 1921 ferkocht waard.

Nei de komst fan de Frânsen yn 1792 waard yn 1796 Schwabenheim foar in twadde kear troch de Frânsen beset en yn 'e brân stutsen. Tusken 1798 en 1814 hearde Schwabenheim mei de rest fan 'e lofter kant fan 'e Ryn by it Napoleontyske ryk. Yn dy tiid waard ek in earste fabryk yn Schwabenheim boud, in sûkerfabryk.

Yn 1904 waard Schwabenheim op it spoar oansletten, dat yn 1955 opheft waard.