Pniëlkapel (Ljouwert)

	Pniëlkapel
	Lokaasje
provinsje	Fryslân
plak	Ljouwert
adres	C. Fabritiusstrjitte 31
koördinaten	53°11' N 5°47' E
	Tsjerklike gegevens
tsjerkegenoatskip	oarspronklik Nederlânsk-herfoarme (rjochtsinnich); letter PKN
ôfstjitten	2011
hjoeddeiske funksje	bernesintrum
	Arsjitektuer
arsjitekt	Hero Feddema & Sn.
boujier	1925
	Kaart
	;

De Pniëlkapel is boud as in kapel fan 'e Feriening fan Rjochtsinnich Herfoarmden yn Huzum (no Ljouwert). Hjoed-de-dei foarmet it gebou ûnderdiel fan in yntegraal bernesintrum.

Skiednis

It gebou stiet op 'e hoeke fan 'e Carel Fabritiusstrjitte (oarspronlik de Suderstrjitte) en de Jozef Israëlstrjitte en ferfong in lytser gebou oan 'e Skrâns. Op 28 jannewaris 1925 waard de earste stien lein en op 7 maaie waard it gebou yn gebrûk nommen. Pniël waard neffens in ûntwerp fan arsjitektenburo Hero Feddema & Sn. as evangelisaasjekapel foar de rjochtsinnich herfoarmden yn Huzum-West boud en der wie plak foar likernôch 500 minsken.^[1]

Nei in grutte ferbouwing yn 1936 naam it oantal sitplakken ta oant 850. Op 28 augustus 1936 waard de tsjerke wer yn gebrûk nommen.

Nei in Samen-op-Wegproses mei de grifformearden fan 'e Skrânstsjerke fusearren de twa herfoarme wykgemeenten fan Huzum-West, de herfoarme Doarpstsjerkewyk en dy fan 'e grifformearde Oasewyk ta de PKN-gemeente Ljouwert-Huzum. De Skrânstsjerke wie al yn 2000 sletten en de wyktsjerkerieden fan 'e Skrânstsjerke en de Pniëlkapel waarden yn 2001 gearfoege. De PKN-gemeente hold yn augustus 2011 foar it lêst in tsjinst yn Pniël.^[2] De tsjerke waard sûnt de hjerst fan 2011 noch foar in skoft troch de pinkstergemeente Elim hierd.

Yn 2016 waard de tsjerke in ûnderdiel fan 'e njonkenlizzende kristlike basisskoalle Johan Willem Friso. Neffens in projekt fan arsjitektenburo Onix waarden de skoalle en de kapel ta in yntegraal bernesintrum ferboud.^[3]^[4]

Oargel

By de ferbouwing yn 'e jierren 1930 waard it âlde oargel ferfongen troch in teäteroargel út it Metropoolteäter fan Skiedam, dat yn 1933 troch de Rotterdamske oargelbouwer Standaart boud wie. Nei it sluten fan Pniël foar de earetsjinst waard it oargel yn 2016 krekt foar de sloop fan it oargel troch oargelmakker Nico Slooff út Lekkerkerk oernommen foar in roomske tsjerke yn Charkov, Oekraïne.^[5]^[6]

Boarnen, noaten en referinsjes

Boarnen, noaten en/as referinsjes:

Wikimedia Commons

Ofbylden dy't by dit ûnderwerp hearre, binne te finen yn de kategory Pniëlkapel, Ljouwert fan Wikimedia Commons.

[1] Ljouwerter Kranten: Ned. Herv. Evangelisatie Pniël te Huizum (10 april 1925).

[2] Histoarysk Sintrum Ljouwert, oproppen 25 novimber 2024.

[3] Ljouwerter Krante, Huizumer Pniëlkerk is nu een basisschool (23 jannewaris 2016).

[4] ONIX, IKC Johan Willem Friso.

[5] Standaart Orgels

[6] Ljouwerter Krante (26 augustus 2015.)

[1]

[2]

[3]

[4]

[5]

[6]