Katedraal fan Cobh

Ut Wikipedy
Springe nei navigaasje Springe nei sykjen
Katedraal fan Cobh

St. Colman's Cathedral

Cobh St. Colman's Cathedral 2015 08 27.jpg
lokaasje
lân Flag of Ireland.svg Ierlân
provinsje Flag of Munster.svg Munster
plak Cobh arms.png Cobh
bysûnderheden
type bouwurk Katedraal
boujier 1868-1915
arsjitekt E.W. Pugin, George Ashlin en Thomas Coleman
boustyl Neogotyk
webside www.cobhcathedralparish.ie

De Katedraal fan Cobh (offisjeel: Sint-Colmankatedraal, Ingelsk: St. Colman's Cathedral, Iersk: Ard-Eaglais Naomh Colmán) is de biskopstsjerke fan it roomsk-katolike bisdom Cloyne yn de havenstêd Cobh oan de Ierske súdkust. De yn neogotyske styl boude katedraal stiet op in hichte op in prominint plak en is om fierrens te sjen. Under de yn de 19e iuw boude katedralen, dy't de âlde sûnt de reformaasje oan de Anglikaanske tawiisde biskopstsjerken ferfange moasten, is de katedraal fan Cobh ien fan de djoerste en moaiste katedralen.

Skiednis[bewurkje seksje | boarne bewurkje]

Foarskiednis[bewurkje seksje | boarne bewurkje]

De stifting fan it bisdom Cloyne yn de sechde iuw giet op de muonts Colman (fan Cloyne) werom. Oer syn grêf ûntstie yn de 13e iuw de goatyske katedraal fan Cloyne. De katedraal waard lykas alle oare Ierske katedralen yn de 16e iuw oan de Anglikaanske Tsjerke fan it Ingelske keningshûs tawiisd. Oant yn it ein fan de 18e iuw moast de katolike tsjerke fan Ierlân as ûndergrûnske tsjerke sjen te oerlibjen. Sûnt 1769 hie de katolike biskop fan Cliyne syn sit yn Cobh en de lytse parochytsjerke tsjinne yn dy tiid as katedraal fan de biskop. Doe't yn it midden fan de 19e iuw de wetlike beheinings ferminderen en de finânsjele mooglikheden ferbetteren (yn dy tiid waard der goed jild fertsjinne yn Cobh om't it as emigraasjehaven tsjinne), ûntstie it plan om in nije katedraal te bouwen.

Brânskildere raam yn de katedraal fan Kristus dy't in lammenien genêst

De bou fan de hjoeddeiske katedraal[bewurkje seksje | boarne bewurkje]

Op 30 septimber 1868 waard begûn mei de bou fan de katedraal yn in tiid doe't Cobh noch Queenstown hiet. Net earder as mei de ûnôfhinklikens fan Ierlân yn 1922 krige de stêd de âlde namme Cobh werom. De arsjitekten fan de nijbou wiene E.W. Pugin, George Ashlin en Thomas Coleman. Yn 1915 waard 47 jier letter de katedraal foltôge. De katedraal fan Cobh is de op ien nei grutste tsjerke fan de Republyk Ierlân. It is in trijeskepige basilica yn krúsfoarm, dy't oanslút op de Frânske katedralengoatyk. De toer is mei in hichte fan 91,4 meter nei dy fan de katedraal fan Limerick de heechste fan it lân.

Oargel[bewurkje seksje | boarne bewurkje]

It oargel efter in goatysk front waard yn 1905 troch it oargelboubedriuw Telford & Telford (Dublin) boud en krige in plak op de westlike galerij. It instrumint hat 46 registers op trije manualen en pedaal. Oarspronklik hie it oargel pneumatyske trakturen, dy't yn de jierren 1970 ferfongen waarden troch elektro-pneumatyske trakturen.

Kariljon[bewurkje seksje | boarne bewurkje]

It kariljon mei 46 brûnzen klokken waard yn 1916 ynstallearre. De grutste weget 3,6 ton, is ferneamd nei de patroanhillige fan de tsjerke en is ek de grutste klok fan Ierlân.

Boarnen, noaten en referinsjes[boarne bewurkje]

Boarnen, noaten en/as referinsjes:

Dizze side is alhiel of foar in part in oersetting fan de Dútsktalige Wikipedyside; sjoch foar de bewurkingsskiednis: [1]