Gerrit Willem Navis
Gerrit Willem Navis (Ruurlo, 20 maaie 1900 - Neuengamme, 15 desimber 1944) wie in Frysk fersetsstrider yn de Twadde Wrâldkriich .
Gerrit Willem Navis wie in Frysk fersetsstrider. Hy wenne yn Burgum en wurke by de belestingtsjinst. Hy wie belutsen by in protte fersetsaktiviteiten yn Fryslân, wêrûnder de ynfal op it gemeentehûs fan Burgum, wêrby't in protte bonkaarten bútmakke waarden, en it ferset fan de belestingtsjinst, dy't jild nei it ferset stjoerde, beide yn it foardiel fan ûnderdûkers. Yn july 1944 drige in tal fersetsgroepen oprôle te wurden, trochdat ien fan de leden fan it ferset yn Dútske hannen fallen wie. Navis waard warskôge en besleat mei syn húshâlding te flechtsjen en ûnder te dûken yn syn âlderlik hûs yn Putten yn Gelderlân.
As represaillemaatregel foar in fersetsoanfal op in auto mei Dútske ofsieren by Putten, waarden sa'n 660 folwoeksen manlju út Putten oppakt en nei Dútslân brocht. Navis waard dêrby ek arrestearre en nei it konsintraasjekamp Neuengamme stjoerd, dêr't er op 15 desimber 1944 yn Ladelund stoar.
Nei de oarloch waard de G.W. Navislaan yn Burgum nei him ferneamd. Navis wie in neef fan Gerhard Willem Navis, in oare fersetsstrider.