De Fûgelhelling
.jpg)
De Fûgelhelling yn Oerterp is in opfangsintrum foar lânseigen fûgels en sûchdieren.
Yn 1975 sette fûgelwachter Douwe Miedema (1938-1999), anestesyferpleechkundige fan berop, thús útein mei it fersoargjen fan fûgels dy't it sels net mear rêden. Dat wiene yn dy tiid fral rôffûgels. Tegearre mei syn frou Griet Miedema wisten hja ek oaren foar it wurk te ynteressearjen. Troch harren krewearjen is De Fûgelhelling útgroeid ta wat it no is. Mei troch de sintrale lokaasje yn it Noarden oan de A7 is it ien fan de belangrykste opfangsintra fan Fryslân, Grinslân, Drinte en de kop fan Oerisel.
In soad bisten wurde slachtoffer fan it ferkear, fan ramen yn gebouwen, fan gif, omswalkjende katten of oare oarsaken troch minsklik hanneljen. Eartiids gyng it om folle lytsere tallen, mar hjoed-de-dei wurde der alle jierren wol 10.000 bisten opnommen dy't it net mear selsstannich yn 'e natoer rêde.
It doel fan De Fûgelhelling is om de bisten wer sa gau mooglik frij te litten as hja dêr sûn genôch foar binne. Ek soarget De Fûgelhelling foar foarljochting. De Fûgelhelling hat in besikerssintrum dat geregeldwei iepen is foar publyk. By De Fûgelhelling leit in lyts stikje natoergebiet fan goed 1 hektare dat Douwe's Gea hjit. Der is in swellewand, in fiver, in flintertún en der binne ferskillende biotopen oanlein. Ek wurde dêr reeën opfongen. Yn dat stikje natoer hawwe likernôch 40 ferskillende fûgelsoarten harren nêst en der binne 300 ferskillende plantesoarten teld.
De organisaasje wurket mei sa'n 60 frijwilligers (2023) en hat likernôch 9.000 donateurs (2019).[1][2]
Keppeling om utens
[bewurkje seksje | boarne bewurkje]
| Boarnen, noaten en/as referinsjes: |