Coming-of-age

Ut Wikipedy
Jump to navigation Jump to search

Coming-of-age (ek wol stavere as coming of age) is in Ingelske term dy't safolle betsjut as "folwoeksen wurde". Dêrmei wurdt ornaris net sasear doeld op lichaamlike folwoeksenens, dat lykslein wurde kin mei mearderjierrigens, mar earder op geastlike en emosjonele riping. Dat proses falt gauris gear mei fysike riping yn 'e tinerjierren, mar dat hoecht net. It kin bygelyks ek gean oer in lichaamlik folwoeksen man fan 'e yn tritich dy't emosjoneel noch nea folwoeksen wurden is. Coming-of-age is in sjenre yn 'e literatuer, yn films, en yn tillefyzjesearjes. Sokke ferhalen lizze de klam op karakterferoarings ynstee fan aksje, hoewol't dy beide eleminten inoar net needsaaklikerwize útslute. De Bildungsroman is in spesifyk subsjenre fan it coming-of-ageferhaal.

Guon bekende foarbylden fan coming-of-ageferhalen út 'e literatuer binne: Candide fan Voltaire (1759), Northanger Abbey fan Jane Austen (1817), A Portrait of the Artist as a Young Man fan James Joyce (1916), The Catcher in the Rye fan J.D. Salinger (1951), en To Kill a Mockingbird fan Harper Lee (1960). Foarbylden fan bekende films dy't draaie om coming-of-ageferhalen binne: Bambi (1942), The Breakfast Club (1985), Mermaids (1990), American Pie (1999), Girl, Interrupted (1999), de Harry Potter-filmsearje (2001-2011), Juno (2007), Superbad (2007), en Moonlight (2016). Foarbylden fan tillefyzjesearjes mei in coming-of-agetema binne: Happy Days, Degrassi Junior High, The Wonder Years, Boy Meets World, Glee en Awkward.

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.