Alexis Nakota Sû Naasje

Ut Wikipedy
Jump to navigation Jump to search
Alexis Nakota Sû Naasje
Flagge fan de Alexis Nakota Sû Naasje.PNG
algemiene ynformaasje
Ingelske
  namme
Alexis Nakota Sioux Nation
etnisiteit Stony
lân Flag of Canada.svg Kanada
haadkertier Glenevis (Alberta)
ledetal 1.800 (2012)
erkenning Flag of Canada.svg Kanada
oprjochte 1877
reservaat
reservaat Alexis Reservaat 133
Alexis Cardinal River Res. 234
Alexis Elk River Reservaat 233
Alexis Whitecourt Reservaat 232
lokaasje Alberta
oerflak 144,8 km²
ynwenners 820 (2011)
offisjele webside
www.alexisnakotasioux.com
Lokaasje fan Stony-stammen yn Alberta.

De Alexis Nakota Sû Naasje (Ingelsk: Alexis Nakota Sioux Nation) is in Yndiaanske stamme-organisaasje yn Kanada, mei eigen reservaten yn it sintrale part fan 'e provinsje Alberta. De "earste naasje" (in Kanadeeske oantsjutting foar in Yndianestam of -troep), datearret as offisjele stamme-organisaasje fan 1877. It haadkertier is fêstige yn Glenevis, yn Alberta, in útbuorren dy't sa'n 70 km noardwestlik fan 'e stêd Edmonton leit.

Demografy[bewurkje seksje | boarne bewurkje]

De Alexis Nakota Sû Naasje hie neffens gegegevens út 2012 doe 1.800 leden. Dat binne etnyske Stony (Stoney), fan 'e substamme fan 'e Noardlike Stony. De namme fan 'e stamme omfiemet de begripen "Nakota", dat de nauwe etnyske bân mei de Assiniboin (Assiniboine) beklammet, en "Sû", dat ferwiist nei de (wat minder nauwe) besibskip oan 'e (Sioux).

Reservaten[bewurkje seksje | boarne bewurkje]

De Alexis Nakota Sû Naasje hat fjouwer eigen reservaten yn 'e omkriten fan Glenevis, dy't yn totaal 144,8 km² beslane en yn 2011 in ynwennertal hiene fan 817 minsken. It giet om 'e folgjende reservaten:

Stony-Yndianen yn fol ornaat ûnder de powwow fan 'e Alexis Nakota Sû Naasje fan 2007.

Skiednis[bewurkje seksje | boarne bewurkje]

De opperhaden fan 'e Alexis-troep fan 'e Noardlike Stony ûndertekenen yn 1877 in offisjeel dokumint wêrmei's se harren oansleaten by it Ferdrach Nû. 6, ien fan 'e regionale, saneamde Nûmere Ferdraggen tusken de ûnderskate Yndiaanske folken en de Britske koloniale autoriteiten yn Kanada. Hoewol't de stamme fan âlds troch in erflik opperhaad en guon mindere haadlju bestjoerd waard, leit it regear hjoed de dei yn 'e hannen fan in keazen opperhaad en in keazen stammeried, allebeide mei terminen fan fjouwer jier.

Eveneminten[bewurkje seksje | boarne bewurkje]

Elts jier yn july wurdt der yn it Alexis Reservaat in powwow holden dy't in protte toeristen lûkt. Der is in softbaltoernoai mei in haadpriis dy't oprinne kin oant 14.000 Kanadeeske dollar, ôfhinklik fan it oantal meidwaande tiims, en fierders binne der wedstriden yn trommeljen en yn ûnderskate lânseigen foarmen fan dûns. Der dogge net inkeld Stony mei, mar ek Yndianen fan oare etnyske groepen.

De wichtichste delsetting fan 'e Alexis Nakota Sû Naasje leit oan 'e igge fan Lac Ste. Anne, dy't de Noardlike Stony Wakâmne neame, wat "Gods Mar" betsjut. Eltse simmer is der in pylgertocht nei de mar ta, dêr't oer in perioade fan fjouwer dagen soms wol 40.000 minsken oan meidogge, de measten fan Yndiaansk of Métis-komôf.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.