Cochem

	Cochem
	Emblemen
	Bestjoer
Lân	Dútslân
dielsteat	Rynlân-Palts
lânkring	Cochem-Zell
	Sifers
Ynwennertal	5.199 (2021)
Oerflak	21,8 km²
Befolkingsticht.	245 ynw./km²
Hichte	85 m
	Oar
Postkoade	56812
Tiidsône	UTC +1
Simmertiid	UTC +2
Koördinaten	50° 8'N 7° 10'E
	Offisjele webside
	www.cochem.de
	Kaart
	;

Cochem is in stêd oan de Mûzel yn de Dútske dielsteat Rynlân-Palts.

It plak is de Kreisstadt fan de lânkring Cochem-Zell. Mei likernôch 5.200 ynwenners (2021) is Cochem ien fan de lytste kringstêden fan it lân. Sûnt 7 Juny 2009 makket Cochem diel út fan de ferbânsgemeente Cochem.

Skiednis

Al yn de keltyske en romeinske tiid waard it hjoeddeiske Cochem bewenne. Yn 886 wurdt it plak foar it earst dokumintearre ûnder de namme Villa cuchema. Oare nammen yn de skiednis binne Cuhckeme en Chuckeme (893), Cochemo (1051), Chuchumo (1056), Kuchema (1130), Cuchemo (1136), Cocheme (1144), dan Cuchme, en oant yn de 18e iuw Cochheim of Cocheim.

It plak wie in keizerlik stee en waard troch kening Adolf fan Nassau yn 1294 oan de aartsbiskop fan Trier oerdroegen. Oant de Frânske besetting yn 1794 bleau it in part fan it Karfoarstendom Trier. Cochem krige yn 1332 stedsrjochten en koart neitiid waard der úteinset mei de oanlis fan de muorren, dy't diels noch jimmeroan besteane. Tusken 1423 en 1425 waard de stêd teheistere troch de Swarte Dea. Yn de Tritichjierrige Oarloch waard de stêd belegere, mar it slagge net de stêd yn te nimmen. Yn 1689 lykwols stieken de troepen fan kening Loadewyk XIV de Winneboarch by Cochem yn brân en feroverden dêrnei ek de stêd Cochem mei it kastiel. De weropbou fan de stêd gong stadich en naam in lang skoft yn beslach. Yn 1794 kaam Cochem op 'e nij ûnder Frânske hearskippij. It Kongres fan Wenen wiisde Cochem yn 1815 ta oan it Keninkryk Prusen.

Louis Fréderic Jacques Ravené kocht de ruïne fan it eardere keizerlike kastiel yn 1866 en begûn mei de weropbou der fan om hjir simmerdeis te ferbliuwen.

Earst nei't de brêge oer de Mûzel boud waard yn 1927 foege men yn 1932 de beide fiskersdoarpen Cond en Sehl tegearre mei de stêd. Dy brêge, mei de namme Skagerrak Brücke, waard op 23 jannewaris 1927 yn gebrûk nommen. Grutte dielen fan de âlde binnenstêd fan Cochem waarden krekt as de nije brêge yn de Twadde Wrâldkriich ferneatige. Nei de kriich folge de weropbou en op 29 september 1949 wie de brêge wer klear. In twadde brêge oer de Mûzel mei de namme Nordbrücke waard tussen 1990 en 1993 boud en op 3 septimber 1993 yn gebrûk nommen.

Sûnt 1946 is de stêd in part fan de nij stifte dielsteat Rynlân-Palts.

Yn 2011 waarden by it wurkjen oan it spoar trije bommen fan 500 kg. út de Twadde Wrâldoarloch ûntdutsen. Twa fan de bommen waarden ûntmantele, ien waard yn beton getten. In grut part fan de stêd moast by it ûnskealik meitsjen fan de bommen evakueart wurde.