Vladimirkatedraal (Astrachan)
| Vladimirkatedraal Собор Святого Владимира | ||
| ||
.jpeg)
| ||
| Lokaasje | ||
| lân |  Ruslân
| |
| oblast |  Astrachan
| |
| plak |  Astrachan
| |
| koördinaten | 46° 20' N 48° 00' E | |
| Arsjitektuer | ||
| arsjitekt | Vasili Kosjakov | |
| boujier | 1895-1902 | |
| boustyl | Neobyzantynske arsjitektuer | |
| monumintale status | Regionaal moonumint | |
| monumintnûmer | 301410577810005 | |
| Webside | ||
| Bisdom Astrachan | ||
| Kaart | ||
  | ||
De Vladimirkatedraal (Russysk: Собор Святого Владимира; Sobor svjatogo Vladimira) is in katedraal yn Astrachan yn it suden fan Ruslân. De katedraal is wijd oan Vladimir de Grutte, de foarst dy't der foar keas om Ruslân te kristenjen. It is ien fan 'e belangrykste neobyzantynske tsjerken út de tiid fan it Keizerryk Ruslân.
Skiednis
[bewurkje seksje | boarne bewurkje]Yn it ramt fan it 900-jierrich jubileum fan 'e kristening fan Ruslân naam de dûma fan Astrachan op 8 juny 1888 it beslút de tsjerke te bouwen. De bou fûn plak tusken 1895 en 1902, yn in wyk dêr't likernôch 11.000 otterdokse kristenen wennen, fuort op 'e grins fan 'e Russyske en Tataarske delsettings. De tsjerke, sa lei yn 'e reden, moast in wichtige rol spylje by de missy ûnder de islamityske Tataren. Sa wiene de grutte prosesje en oare plechtigheden in moaie gelegenheid om de moslims yn 'e kunde te bringen mei de otterdoksy.
Op 10 septimber 1890 waard in ûntwerp fan de arsjitekt Vasili Kosjakov goedkard. It ynsammeljen fan jild eine sa en noch in útbraak fan de goalera soargen der foar dat it wurk net earder as op 5 maart 1895 útein sette. De arsjitekt Korzjinski hold tafersjoch op 'e bou, dy't sân jier duorre. Yn 1902 wie it gebou foltôge en dat wie krekt op 'e tiid foar de fiering fan it 300-jierrich jubileum fan it bisdom Astrachan.
Sovjet-Uny
[bewurkje seksje | boarne bewurkje]Yn maart 1919 waard de tsjerke slim skeind by strjittegefjochten yn Astrachan. Yn 1923 skeelde it net folle of de tsjerke wie yn hannen kommen fan 'e oanhingers fan 'e Libbene Tsjerke. De geastliken dy't oan 'e tsjerke ferbûn wiene, wiene ferdield, mar tanksij de parochianen krigen de fernijers gjin tagong yn 'e tsjerke en bleau de katedraal ynearsten trou oan 'e Russyske-Otterdokse Tsjerke. Oare tsjerken kamen lykwols wol yn hannen fan 'e Libbene Tsjerke en sa ek de Untsliepeniskatedraal, sadat de Vladimirtsjerke tsjinst begûn te dwaan as katedraal fan it bisdom. Yn 1936 krige de Libbene Tsjerke lang om let ek de Vladimirkatedraal yn hannen, mar ek dy soene de tsjerke net lang hâlde, want yn 1939 lieten de autoriteiten it gebou dochs hielendal foar de earetsjinst slute.
It doel wie om 'e katedraal ôf te brekken, mar neffens de oerlevering soene islamityske Tataren, wêrfan't in soad by de bou holpen hiene, in delegaasje stjoerd ha nei Moskou om by de foarsitter fan it Presidium fan 'e heechste Sovjet te pleitsjen foar it behâld. Hoe dan ek, de katedraal bleau stean en waard foar in skoft as opslachskuorre foar hout, moal en nôt brûkt. Yn 'e jierren 1960 sette in nije weach fan ferfolgings útein en doe drige op 'e nij de sloop fan 'e katedraal. Dy kear woene se de katedraal opblaze, mar wylst de tariedings oan 'e gong wiene, ûnstiene der demonstraasjes. Otterdokse leauwigen omsingelen mei Tataarske moslims trije dagen lang it gebou as in libbene ring. De autoriteiten skrokken fan it ferset en loeken de plannen yn.
Yn 1967 waard de tsjerke ferboud ta busstasjon. De katedraal waard fan binnen ferskillende kearen oerskildere en op it plak fan it eardere alter waarden publike toiletten delset.[1][2]
Weriepening
[bewurkje seksje | boarne bewurkje]Yn 1999 waard de tsjerke werom jûn oan de Russysk-Otterdokse Tsjerke, dy't de katedraal restaurearje liet.
| Boarnen, noaten en/as referinsjes: | ||
|
Dizze side is foar in part of alhiel in oersetting fan de Russysktalige Wikipedyside ru:Успенский собор (Астрахань).
|
