Trije-ienheidskleaster (Tsjernihiv)
| Trije-ienheid-Elía Kleaster | ||
| ||
| ||
| Lokaasje | ||
| lân |  Oekraïne
| |
| oblast |  Oblast Tjernihiv
| |
| plak |  Tsjernihiv
| |
| koördinaten | 51° 28' N 31° 16' E | |
| Kleastergegevens | ||
| denominaasje | oant 2023: Oekraynsk-Otterdokse Tsjerke (oant 2022 ferbûn oan it patriargaat fan Moskou) | |
| oprjochting | 1649 | |
| opheffing | Sovjet-tiid, 2023 | |
| weriepening | 1988 | |
| Ynformaasje bou | ||
| boujier | 1679-1695 (katedraal) | |
| boustyl | Oekraynske barok | |
| Webside | ||
| Side fan de OOT oldchernihiv.com | ||
| Kaart | ||
  | ||
It Trije-ienheidskleaster (Oekraynsk: Троїцько-Іллінський монастир; Trjoitsko Illinskyj Monastyr) yn Tsjernihiv yn Oekraïne wie oant 2023 in otterdoks kleaster. It kleaster waard om 1069 hinne stifte troch de otterdokse hillige Antonyj Antonij Petsjerskyj, dy't foar de monastike delsetting op it plak grotten begûn út te dollen.
Yn 'e Sovjet-tiid waard it kleaster sletten en ûnteigene, mar sûnt 1988 fuksjonearre it wer as in religieus kompleks fan 'e Oekraynsk-Otterdokse Tsjerke (OOT), dy't oant 2022 noch ûnder it Moskouse patriargaat foel. De kleastergebouwen binne steatseigendom en ûnderbrocht by it iepenloftmuseum Ald-Tsjernihiv. De OOT hierde de kleastergebouwen, mar lykas op mear plakken beëinigen de autoriteiten nei de Russyske ynfaazje yn 2022 de oerienkomsten mei de OOT oer it gebrûk fan tsjerken yn eigendom fan 'e steat.[1]
Yn 2023 waard de katedraal fan it kleaster sletten en yn 2024 waard de tagong fan it hiele kleaster ôfsletten.
Skiednis
[bewurkje seksje | boarne bewurkje]It hjoeddeiske kleaster datearret fan 1649 en waard yn opdracht fan 'e kozakkelieder Stepan Pobodajlo op 'e nij stifte, nei't it âlde kleaster al yn de tiid fan de Mongoalske ynfallen fan 1239 ferlitten wie. Ut de iere tiid fan it oarspronklike grotkleaster mei ûnder- en boppegrûnske gebouwen bleaune de boppegrûnske Elíatsjerke en de Antoniusgrotten mei meardere ûndergrûnske kapellen bewarre. It hjoeddeiske oansjen fan 'e eastlik fan it kleaster steande Elíatsjerke is it risseltaat fan in 18-iuwske barokke rekonstruksje. Noardwestlik fan 'e Elíatsjerke stiet in trijeliddige klokketoer út de jierren 1908-1910.[2] It kleaster wie yn 'e 17e iuw de sit fan de aartbiskoppen fan Tsjernihiv.
Under it Sovjetregear waard it kleaster opheft. Nei de ferfolgings fan 'e ateïstyske autoriteiten waard de katedraal mei de oangrinzgjende grûn yn 1988 we oerdroegen oan 'e doe Russysk-Otterdokse Tsjerke, letter de Oekraynsk-Otterdokse Tsjerke fan it patriargaat fan Moskou. De tsjerke waard de katedraal fan it otterdokse bisdom Tsjernihiv.
Trije-ienheidskatedraal
[bewurkje seksje | boarne bewurkje]Op inisjatyf fan aartsbiskop Lazar Baranovitsj waard yn 'e jierren 1679-1695 de Trije-ienheidkatedraal boud. Sûnt dy tiid draacht it kleaster ek de namme fan de Trije-ienheid. De katedraal heart ta de moaiste foarbylden fan 'e Oekraynske barok. In brân yn 1731 wie de oarsaak dat de trijeskippige katedraal foar lange tiid fan 'e oarspronklike sân mar trije koepels besiet: in grutte sintrale koepel en twa westlike koepels. De koepels dy't by de brân fan 1731 ferlern gien wiene, binne yn 'e jierren 1980 rekonstrueare.
Yn 'e katedraal binne 17e-iuwske oant 19e-iuwske muorreskilderings bewarre bleaun, de tsjintwurdige ikonostaze is 20e-iuwsk.[3]
Kontroverse
[bewurkje seksje | boarne bewurkje]De gebouwen foarmje ûnderdiel fan it nasjonale arsjitekturale en histoaryske museum 'Ald Tsjernihiv'. It bisdom fan 'e Oekraynsk-Otterdokske Tsjerke dat nei de Oekraynske tsjerkeskuorring loyaal bleau oan it patriargaat fan Moskou, brûkte de katedraal fan it museum Ald Tsjernihiv op basis fan in fiifjierrich kontrakt, dat alle kearen ferlingd waard. Sa brûkte it bisdom fan 'e Oekrynsk-Otterdokse Tsjerke (MP) goed tritich jier lang de katedraal. Fanwegen de ûnderstelde bannen mei it patriargaat fan Moskou waard it kontrakt de lêste kear net ferlinge. Dêrmei wie de katedraal ien fan 'e monuminten, dy't it bisdom fan 'e Oekraynsk-Otterdokse Tsjerke (patriargaat Moskou) kwyt rekke. Op 5 oktober 2023 liet it museum de katedraal fersegelje en waard de frije tagong ferbean, neidat parochianen en preesters ûnder tafersjoch fan fertsjintwurdigers fan it museum harren besittings út de katedraal droegen. Reliken, belangrike ikoanen en oare registrearre saken moasten yn 'e katedraal efterbliuwe.[4][5] It hiele kleasterkompleks waard op 7 maart 2024 fersegele.[6]
It Oekraynske parlemint, de Verchovna Rada, stimde yn oktober 2023 foar in wetsûntwerp om de oan it patriargaat fan Moskou loyale Oekraynsk-Otterdokse Tsjerke hielendal te ferbieden. Dat barde nei't Kiëv de Oekraynsk-Otterdokse Tsjerke der fan fertocht gear te wurkjen mei it regear fan Moskou. De Oekraynsk-Otterdokse Tsjerke ûntkent de ûnderstelde beskuldigingen en hat fuort nei de Russyske ynfaazje yn 2022 de bannen mei it Moskouse patriargaat ferbrutsen. De OOT beskôget him net mear as ûnderdiel fan 'e Russysk-Otterdokse Tsjerke, mar as in apart tsjerkegenoatskip.[7] Yn in reaksje sei in wurdfierder fan 'e Oekraynsk-Otterdokse Tsjerke dat it wetsûntwerp stridich mei de grûnwet fan Oekraïne en it Europeeske Ferdrach fan Minskerjochten is. [8]
Gebouwen
[bewurkje seksje | boarne bewurkje]It kleaster bestiet út de folgjende gebouwen:
- De Elíatsjerke (2e helte fan de 12e iuw);
- de Trije-ienheidskatedraal (1679-1689);
- de refektoariumtsjerke Marije-Timpelgong (1677-1679);
- de klokketoer (1775).
- Ofbylden
-
Klokketoer -
Kapellen -
Refektoariumtsjerke -
Poarte -
Elíatsjerke mei klokketoer -
Grotkapel
Keppeling om utens
[bewurkje seksje | boarne bewurkje]- (ru) Ald Tsjernihiv
| Boarnen, noaten en/as referinsjes: | ||
|
Dizze side is alhiel of foar in part in oersetting fan de Russysktalige Wikipedyside; sjoch foar de bewurkingsskiednis: ru:Покровский монастырь (Киев)
|
