Sint-Panteleimonkatedraal (Kiëv)

Ut Wikipedy
Springe nei navigaasje Springe nei sykjen
Sint-Pantaleonkatedraal

Пантелеймонівський собор

Свято-Пантелеймонівський собор ввечері.jpg
lokaasje
lân Flag of Ukraine.svg Oekraïne
lânsdiel Flag of Kiev Oblast.svg Kiëv oblast
plak Flag of Kyiv Kurovskyi.svg Kiëv
adres Akademika Lebedjeva-strjitte, 23
bysûnderheden
type bouwurk Katedraal
boujier 1905-1912
arsjitekt J.F. Jermakov
boustyl Neobyzantynske styl
webside Side fan it kleaster

De Sint-Pantaleonkatedraal (Oekraynsk: Пантелеймонівський собор; Pantelejmonski sobor) is in katedraal fan de Oekraynsk-Otterdokske Tsjerke fan it Patriargaat fan Moskou (Eparchy Kiëv) en de katolikon fan it kleaster mei deselde namme yn de oekraynske haadstêd Kiëv.

Skiednis[bewurkje seksje | boarne bewurkje]

De yn it tiidrek fan 1905 oant 1912 troch arsjitekt Jevgeni Fedorovitsj Jermakov (1968-1914) boude monumintale katedraal wurdt as in hichtepunt fan de neobyzantynske arsjitektuer beskôge en waard yn 1914 plechtich ynwijd.

De katedraal waard yn 1920 troch de bolsjewiken sletten en plondere. Yn de Twadde Wrâldkriich kaam de katedraal as strategysk militêr punt yn 1941 yn de ferdigeningsliny fan de stêd te lizzen. Fan gefolgen waard de katedraal troffen troch in swiere mortieroanfal. Dêrtroch en troch de anti-religieuze hâlding fan de Sovjet-autoriteiten bleau de katedraal oant yn de jierren 1990 yn in jammerdearlike steat. Nei de oarloch tsjinne de romte fan de katedraal om wittenskiplike eksperiminten út te fieren troch de Akademy fan Wittenskippen fan Oekraïne.

Op 7 maaie 1990 waard de doe koepelleaze katedraal oan de Oekraynsk-Otterdokske Tsjerke werom jûn en sette in restauraasje en rekonstruksje útein. De katedraal waard yn 1998 troch de metropoltyt Volodymyr fan Kiëv en hiel Oekraïne op 'e nij oan de hillige Pantaleon wijd. Yn 2002 waard troch de Hillige Synoade besletten dat it de katedraal waard fan in selsstannich nonnenkleaster.