Reddingsboatreed

Ut Wikipedy
Reddingsboatreed 2

De Reddingsboatreed is in strjitte mei fjouwer monumintale pânen yn Moddergat.

Skiednis[bewurkje seksje | boarne bewurkje]

De strjitte krige syn namme troch de reddingsboat dy't hjir ± 1878 yn in loads lei. Inkele jierren dêrfoar hie dr. L.A. Buma út Makkum in legaat fan ƒ 12.000 skonken oan de Noard- en Súd-Hollânske Redding-Maatskippij om oan de Fryske kust in reddingsstasjon te fêstigjen. De reddingmaatskippij keas Moddergat út as plak fen fêstiging en kocht in terrein foar de bou fan in loads, dêr't de nij reddingsboat, de "L.A. Buma" (en letter de L.A. Buma II en L.A. Buma III) ûnderbrocht waard.[1] De earste reddingsaksje wie yn 1881. By aksje moast de reddingsboat fanút de loads mei help fan hynders en katrollen oer de dyk sleept wurde.[2] Yn it earstoan stie de loads by de dyk, mar dy waard letter ferset nei de ein fan de Reddingsboatreed.[3]It stasjon is oant 1941 brûkt.[3] De taak waard dêrnei oernomd troch de motorstrânrêdingsboat Johan de Witt fan Skiermûntseach.[2]

De bebouwing oan de Reddingsboatreed komt út de perioade om ± 1800. De pânen oan de westkant mei de nûmers 2, 4, 6 en 8 binne erkend as ryksmonumint en binne neffens Stenvert [et al.] een aardig ensemble. Reddingsboatreed 2 waard omtrint 1780 boud (it jieranker "1795" is by in lettere restauraasje oanbrocht en net goed). Reddingsboatreed 4 is yn 1815 boud op in fan Reddingsboatreed 2 ôfskieden part fan it persiel. Reddingsboatreed 6 en 8 binne beide fan 1796. Reddingsboatreed 6 hie in tegeltablo mei de ôfbylding fan in kofskip makke troch Meindert Jans Vogelzang. In foarige eigener hat it tableau ferkocht, mar it is nei wat omswervingen wer werom yn Moddergat.[4][5]

Literatuer[bewurkje seksje | boarne bewurkje]

  • Ihno Dragt, Aan de vissers heeft het niet gelegen. Het reddingstation van Moddergat (1878-1942), 2011.

Boarnen, noaten en referinsjes[boarne bewurkje]

Boarnen, noaten en/as referinsjes:

  1. De bemanning bestie út in kapitein, dy't in fêste fergoeding fan ƒ 60 krige, en tolve matroazen dy't betelle waarden foar oefeningen én reddingsoperaasjes (boarne Leeuwarder Courant d.d. 25 maart 1877 Westdongeradiel)
  2. 2,0 2,1 Kuipers 2000:53 t/m 56
  3. 3,0 3,1 Van den Berg 1983:133
  4. Hillebrand 2011:81
  5. Yn 1953 wie it tablo noch yn in fiskerswenning yn Moddergat - Leeuwarder Courant d.d. 11 septimber 1953: [1] De Friese kustvisserij had 150 jaar geleden alleen betekenis in de Dongeradelen