Catharina-Amalia fan de Nederlannen

Prinses Amalia, maaie 2023

Catharina-Amalia fan de Nederlannen (De Haach, 7 desimber 2003), folút Catharina-Amalia Beatrix Carmen Victoria van Oranje-Nassau, Prinsesse fan Oranje, Prinsesse fan de Nederlannen, Prinsesse fan Oranje-Nassau, is de âldste dochter fan Kening Willem-Alexander en Keninginne Máxima.

Prinsesse Amalia is de earste yn de oarder fan troanopfolging fan har heit Willem-Alexander. Sûnt har heit kening wurden is, is sy Prinsesse fan Oranje.

Berte

Prinsesse Amalia waard snein 7 desimber 2003 om 17.01 oere berne yn it Bronovo-sikehûs yn De Haach. Yn de stêden De Haach, De Helder (Nederlân), Willemstêd (Nederlânske Antillen) en Oranjestêd (Arûba) waard har berte mei 101 salútskotten oankundige. Tiisdei 9 desimber, yn it âlde stêdhûs fan De Haach, joech har heit har berte oan by de boargerlike stân, yn de persoan fan boargemaster Wim Deetman.

Daalks nei oanjefte en it bekend wurden fan de nammen fan de kroanprinsesse, feroare de gemeente Almelo it Balkanplein yn de stêd ta Catharina-Amaliaplein. Op Bonêre waard de lofthaven Flamingo Airport werneamd ta Prinsesse Amalia Airport.

Nammen

De prinsesse wurdt Amalia neamd. By offisjele gelegenheden wurdt de namme Catharina-Amalia brûkt. Soe se itselde dwaan as har heit, dan wurdt dat ek har namme as keninginne.

Prinsesse Amalia is op de neikommende wize ferneamd:

• Catherina kaam by de Oranjes earder foar by Henriëtte Catharina (pakesizzer fan Willem de Swijer en tsiende oerbeppe fan Prinsesse Amalia);
• Amalia kaam by de Oranjes earder foar by Henriëtte Amalia (famke fan Henriëtte Catharina en njoggende oerbeppe fan Prinsesse Amalia);
• Beatrix nei har beppe Keninginne Beatrix;
• Carmen nei har beppe Maria del Carmen Cerruti de Zorreguieta;
• Victoria liket net foar te kommen as namme fan ien fan de foarâlden fan Prinsesse Amalia. As, sa't Willem-Alexander sein hat, de nammen yn de famylje foarkomme dan soe it de namme fan in muoike of nicht ofsfh. wêze moatte. It is lykwols ek mûglik dat se ferneamd is nei har iene peetmuoike, kroanprinsesse Fiktoaria fan Sweden.

Stúdzjes

Amalia gie op 10 desimber 2007 nei groep 1 fan de basisskoalle op de iepenbiere Bloemcampskoalle yn Wassenaar. Sûnt it skoaljier 2015/2016 wie se learling oan it Kristlik Gymnasium Sorghvliet yn De Haach. Op 10 juny 2021 slagge se cum laude foar har vwo-eineksamen. Foarôf oan har achttjinde jierdei behelle se it jachtdiploma. Doe 't se achttjin wie helle sy ek har jachtakte.

De kroanprinses skreau har yn foar it stúdzjejier 2022 -2023 foar de bachelor Politcs, Psychology, Law and Economics (PPLE) oan de Universiteit fan Amsterdam (UvA ). Mei, neffens de UvA, 220 oare studinten trochstie se de seleksjeproseduere. Der wiene 1700 gadingmakkers. De stúdzje duorret trije jier en wurdt jûn yn it Ingelsk. Mei har kar foar Amsterdam wykte se as earste troanopfolchster fan it Hûs Oranje-Nassau ôf fan har foargongers dy't allegear yn Leiden studearren.

Ried fan Steat

Konfoarm artikel 74 fan de Grûnwet waard Amalia fan har achttjinde jierdei ôf "fan rjochtswegen" automatysk lid fan de Ried fan Steat en de Ofdieling advisearring. De prinses krige dêrmei it rjocht om oanwêzich te wêzen by alle gearkomsten fan de Ried fan Steat en de Ofdieling advisearring, al krige se gjin stimrjocht. De Ofdieling advisearring advisearret regear en parlemint oer wetjouwing en bestjoer. Op 8 desimber 2021, de dei nei har achttjinde jierdei, waard sy op in bysûndere gearkomste "binnenlaat" yn de Ried fan Steat. Amalia hold dêrby har earste offisjele taspraak. Oanslutend plante sy in keningslinebeam yn de Frânske tún fan Paleis Kneuterdijk dêr't de bysûndere gearkomste holden waard.

Utkearing

Fan har achttjinde ôf hat Amalia rjocht op in jierliks steatsynkommen fan 296.000 euro en 1.338.000 euro foar personele en materiële stipe. De dei nei har eineksamenútslach fan de middelbere skoalle makke se buorkundich dat hja oant it ôfsluten fan har studintetiid it ynkommensdiel fan har steatsútkearing yn de steatskas werom stoart sil. Amalia sei allinnich dat part fan it ûnkostediel te behâlden yn safier't se dêr gebrûk fan makket.

Boek

Kabaretêre Claudia de Breij skreau yn 2021 op útnûging fan de Ryksfoarljochtingstsjinst in boekje oer prinses Amalia by gelegenheid fan har achttjinde jierdei op 7 desimber 2021. Se spruts yn de simmer fan 2021 ferskate kearen mei Amalia. It boek ferskynde op 11 novimber 2021 ûnder de titel Amalia.

Literatuer

• Hanno de Iongh - Máxima, Willem-Alexander en Amalia: Een vademecum - Amsterdam, Aspekt, 2004.
• Han van Bree en Piet Lekkerkerk - De Oranjes: Van Willem van Oranje tot erfprinses Amalia - Amsterdam, Ryksmuseum, 2006.
• Justine Marcella - De prinsessen van Oranje (Kroonjuwelen-rige) - Hilversum, B for Books, 2018, ISBN 978-9085165019.
• Peter Rehwinkel - Amalia: De plicht roept - Amsterdam, Prometheus, 2021, ISBN 978-9044648362.
• Claudia de Breij - Amalia - Amsterdam, Utgjouwerij Pluim, 2021, ISBN 978-9493256637.
• Arnout van Cruyningen - Van Hortense tot Amalia. Negen koninginnen en een kroonprinses - Utert, Omniboek, 2021, ISBN 978-9401917872.

Boarnen, noaten en referinsjes

Boarnen, noaten en/as referinsjes: