Noarderhaven 106 (Harns)

Ut Wikipedy
Jump to navigation Jump to search
It pakhús oan de Noarderhaven 106 anno 2011’’

It pakhús oan de Noarderhaven 106 is in monumintaal pân yn de stêd Harns.

Skiednis[bewurkje seksje | boarne bewurkje]

It pakhús, mei fjouwer ferdjippings, waard yn 1657 boud yn opdracht fan de keapman Sicce Lubberts. Under waard brûkt foar de opslach fan wyn en de fjouwer ferdjippings waarden brûkt as nôtpakhús. De foargevel oan de noardkant hat in letmaniëristyske trepgevel. De ûntlêstingsbôgen fan de finsters op de ferdjippingen binne dekorearre mei in blokfoarmich patroan. It pân stiet op de hoeke fan de Roepersteech. Yn de sydgevel oan de Roepersteech is in trepgevel mei in hysbalke. Efter dit pân liet Lubberts yn itselde jier 1657 de mouterij ferbouwe ta noch in pakhús. Ek in wenhûs d6erefter oan de Foarstrjitte 61, wie yn besit fan Lubberts en krige troch him yn 1657 in letmaniëristyske trepgevel. Yn dizze wenning soe yn 1898 de skriuwer Simon Vestdijk berne wurde.

De gevelstien mei de inisjalen fan Sicce Lubberts

Oan beide kanten fan de finsters op de earste ferdjipping sitte reliëfs mei de ôfbylden fan de Romeinse godheden Fenus, Seares, Bacchus en Aeolus of Fortuna[1] as symboalen foar de fjouwer jiergongen. Yn it fries yn de foargevel sitte gevelstiennen mei dêrop "anno", "1657" en in stien mei in reliëfdekoraasje en de inisjalen S en L, fan de eigener Sicce Lubberts (sjoch ôfbyld)

It pân is erkend as ryksmonumint. Sûnt 1930 is it pân yn besit fan de feriening Hendrick de Keyser, yn 1978 waard it eartiidske pakhús restaurearre.

De reliëfs mei de Romeinske godheden as symboalen foar de fjouwer jiergongen

Boarnen, noaten en referinsjes[boarne bewurkje]

Boarnen, noaten en/as referinsjes:

  1. De fjirde ôfbylde godheid is neffens Stenvert [et al.] Aeolus, mar neffens de eigener fan it pân, de feriening Hendrick de Keyser, is dit in ôfbyld fan de goadinne Fortuna. Neffens in artikel yn de Ljouwerter Krante d.d. 30 juny 1926 giet it om ôfbylden dy't de (wyn)hannel en de skipfeart symbolisearje.