Naut'sa mawt Stammeried

	Naut’sa mawt Stammeried ; Naut’sa mawt Tribal Council
	algemiene ynformaasje
ôfkoarting	NmTC
nasjonaliteit	Kanadeesk
type org.	koepelorganisaasje
wurkmêd	Yndiaanske gearwurking
haadkertier	Nanaimo (Britsk-Kolumbia)
oprjochte	1983
orgaan	Klahowya
	offisjele webside
	www.nautsamawt.org

De Naut’sa mawt Stammeried (Ingelsk: Naut’sa mawt Tribal Council; soms ôfkoarte ta NmTC) is in regionale Yndiaanske koepelorganisaasje yn it súdlike part fan 'e Kanadeeske provinsje Britsk-Kolumbia, rjochte op gearwurking tusken de ûnderskate stamme-organisaasjes fan 'e Kust-Salisjanen. De organisaasje is oprjochte yn 1983 en hat 11 lidstammen. It haadkertier stiet yn Nanaimo, op Vancouvereilân, mar der is ek in kantoar op it fêstelân, yn Tsawwassen, by de stêd Delta. De Naut’sa mawt Stammeried publisearret in onlinekrante mei as titel Klahowya.

Doel

De Naut’sa mawt Stammeried hat ta doel om 'e lidstammen te advisearjen oer en helpen by saken as ekonomyske ûntwikkeling, finansjeel management en mienskipsplanning (ynkl. romtlike oardering en de oanlis fan fasiliteiten lykas skoallen en kliniken). Fierders biedt de ried eventueel help op it mêd fan bestjoer, de oanlis fan ynfrastruktuer (lykas wegen en brêgen), huzebou, ynspeksjes fan wenten om te sjen oft dy oan alle boufoarskriften foldogge, it ferbetterjen fan 'e drinkwetterkwaliteit, en tarieding foar needgefallen. Dêrnjonken besiket de Naut’sa mawt Stammeried in dialooch op gong te bringen en oan 'e gong te hâlden mei oanbuorjende mienskippen, lykfol oft dy ta oare Yndiaanske stammen hearre of út net-Yndianen besteane.

Lidstammen

De lidstammen fan 'e Naut’sa mawt Stammeried beslane dielen fan súdeastlik en eastlik Vancouvereilân en dielen fan it súdwestlike fêstelân fan Britsk-Kolumbia. Alle lidstammen hearre ta de gruttere folkekloft fan 'e Kust-Salisjanen. Hja wenje oan 'e kusten fan 'e Strjitte fan Georgia, de Strjitte fan Juan de Fuca en fjorden lykas de Burrard-ynham. De lidstammen binne:

de Halalt Earste Naasje, fêstige yn Crofton
de Homalko Earste Naasje, fêstige yn Campbell River
de Klahoose Earste Naasje, fêstige yn Cortes Island
de Malahat Earste Naasje, fêstige yn Mill Bay
de Nanoose Earste Naasje, fêstige yn Lantzville
de Sliammon Earste Naasje, fêstige yn Powell River
de Snuneymuxw Earste Naasje, fêstige yn Nanaimo
de Stz'uminus Earste Naasje, fêstige yn Ladysmith
de Tsawwassen Earste Naasje, fêstige yn Tsawwassen
de Tsleil-Wautût Naasje, fêstige yn North Vancouver
de T'sou-ke Earste Naasje, fêstige yn Sooke

Keppelings om utens

(in) Offisjele webside fan 'e Naut’sa mawt Stammeried

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.