Nasjonaal wyldreservaat (Feriene Steaten)

Ut Wikipedy
Springe nei navigaasje Springe nei sykjen

In nasjonaal wyldreservaat (Ingelsk: national preserve) is in type natoergebiet yn 'e Feriene Steaten, dat ûnder behear stiet fan 'e National Park Service. Om dy status te krijen moatte gebieten as sadanich oanmurken wurde troch it Amerikaanske Kongres. Nasjonale wyldreservaten hawwe de measte skaaimerken dy't ornaris assosjearre wurde mei nasjonale parken, mar yn nasjonale wyldreservaten binne beskate aktiviteiten op it mêd fan 'e eksploitaasje fan natuerlike helpboarnen tastien, dy't yn nasjonale parken net dien wurde meie. Dêrby kin men tinke oan fiskjen, jeien, mynbou en it boarjen nei ierdoalje en/of ierdgas. Hokker aktiviteiten yn in beskaat nasjonaal wyldreservaat krekt tastien binne, leit folslein oan 'e spesifike wetjouwing dy't omtrint dat iene nasjonaal wyldreservaat fan krêft is. Net alle neamde aktiviteiten binne dus yn alle nasjonale wyldreservaten tastien.

In nasjonaal wyldreservaat (national preserve) is net itselde as in nasjonaal natoerreservaat (national reserve) of in nasjonaal faunareservaat (national wildlife refuge). It ferskil sit him yn it feit dat in nasjonaal wyldreservaat inkeld beheard wurde kin troch de National Park Service, wylst it behear fan in nasjonaal faunareservaat yn 'e hannen is fan 'e United States Fish and Wildlife Service en dy fan in nasjonaal natoerreservaat ek oerdroegen wurde kin oan in oerheidsynstânsje fan 'e Amerikaanske steat dêr't it yn leit.

It earste nasjonaal wyldreservaat yn 'e Feriene Steaten wie it Nasjonaal Wyldreservaat Big Thicket yn Teksas, dat yn 1974 oprjochte waard. Datselde jiers noch waard ek it Nasjonaal Wyldreservaat Big Cypress, yn Floarida, oprjochte. Yn Alaska ûntstiene ferskate nasjonale wyldreservaten as gefolch fan wetjouwing dy't opnommen wie yn 'e Alaska National Interest Lands Conservation Act fan 1980, dy't yn sokke reservaten inkeld regulearre foarmen fan jacht, fiskerij en it setten fan strûpen tastie as besteansmiddel of by wize fan sport. Anno 2019 besteane der yn 'e hiele Feriene Steaten 19 nasjonale wyldreservaten, wêrfan't guon, lykas it Nasjonaal Park en Wyldreservaat Denali, yn Alaska, grinzgje oan in nasjonaal park en dêrmei ien gehiel foarmje.

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.