Mongol Derby

Mongol Derby
plak en tiid
lân	Mongoalje
holden yn	Jeraziatyske Steppe
tiid fan it jier	augustus
bysûnderheden
soarte evenemint	sportevenemint (hynstesport)
bestean	2009 – no
offisjele webside
www.mongolderby.com

De Mongol Derby is in hynstesportevenemint dat sûnt 2009 elts jier yn Mongoalje holden wurdt. It is in úthâldingsrace fan 1.000 km oer it Mongoalsk-Mantsjoerijske Greidlân, in ûnderdiel fan 'e Jeraziatyske Steppe, wêrby't de dielnimmers om 'e 36 oant 40 km fan hynder wikselje moatte. De ryddieren wurde beskikber steld troch nomadyske Mongoalske feehâlders. De race beart it systeem fan boadskippers te pearde nei dat de Mongoalske hearsker Djengis Khan yn 1224 ûntwikkele. Yn 2010 waard de Mongol Derby yn it Guinness Book of World Records opnommen as langste race op mear as ien hynder yn 'e wrâld.

Ferrin

It krekte trajekt fan 'e Mongol Derby ferskilt elts jier, en wurdt oant de start fan 'e race geheim holden. De dielnimmers moatte in lânskip trochkruse dat net inkeld út flakten bestiet, mar ek út berchpassen, dellingen, gloaiende en mei bosken begroeide heuvels, sompen, sândunen, furden troch rivieren en drûge streambêden.

Om mei dwaan te meien, moatte de dielnimmers oantoane dat se witte hoe't se mei hynders omgean moatte en dêrnei de tagongspriis fan $13.000 betelje. Dêrfoar meie se 30 Mongoalske hynders brûke, en krije se in team dat harren ûnderstipet, in trije dagen duorjende trening foarôfgeande oan 'e wedstryd en tagong ta de fasiliteiten op 'e halteplakken dêr't fan hynder ferwiksele wurdt, lykas iten en drinken en in pear oeren sliep op in bêd.

By de halteplakken wurde de ynruile hynders ek ûndersocht troch bistedokters, dy't tiidstraffen útdiele meie as der net goed genôch foar de bisten soarge is. De tiidslimyt foar it ôflizzen fan it hiele trajekt fan 1.000 km is tsien dagen. De ruters bringe trochinoar 13 oant 14 oeren deis yn it seal troch. De hynders binne noch heal-wyld, en wegerje soms om te dwaan wat de ruter wol, wat in ekstra útdaging oan 'e race tafoeget.

Dielnimmers

Yn (it represintative jier) 2016 diene 21 manlju en 23 froulju mei oan 'e Mongol Derby, dy't út 13 ferskillende lannen kamen. Om 'e westryd út te riden is op himsels al in hiele prestaasje, mei't dat elts jier mar de helte fan 'e dielnimmers slagget. Yn 2017 kaam de dokumintêre All the Wild Horses út, dy't de Mongol Derby as ûnderwerp hat. De makker, Ivo Marloh, naam dêrfoar tusken 2012 en 2016 trije kear sels diel oan 'e race.

Yn 2018 ried de 28-jierrige Friezinne Hinke van der Werf út Dearsum, in dosinte ferpleechkunde oan 'e Hânzehegeskoalle yn Grins, de Mongol Derby yn sân dagen út, trije dagen foar de tiidslimyt. Fan it 44e en lêste plak op 'e earste dei ried hja nei in finish op it 7e plak ta. Boppedat waard har de Vets' Choice Award takend, in priis dy't útrikt wurdt troch de oan it evenemint ferbûne bistedokters, om't se fan alle dielnimmers it bêst om har hynders tocht hie. Mei har dielname oan 'e Mongol Derby helle Van der Werf €3.300 oan sponsorjild op foar it goede doel Dokters sûnder Grinzen (MSF).

Winners

jier	lân	winner(s)
2009	Súd-Afrika Mongoalje	Charles van Wyk Sjiravsamboo Gabadrach
2010	Feriene Steaten	Justin Nelzen
2011	Súd-Afrika	Craig Egberink
2012	Ierlân	Donal Fahy
2013	Ingelân	Lara Prior-Palmer
2014	Austraalje	Sam Jones
2015	Súd-Afrika	Byeronie Epstein
2016	Austraalje Meksiko Kanada	William Comiskey Marcia Hefker Miles Heidi Telstad
2017	Súd-Afrika Austraalje	Barry Armitage Ed Fernon
2018	Austraalje	Adrian Corboy
2019	Feriene Steaten	Bob Long

Keppelings om utens

• (in) Offisjele webside fan 'e Mongol Derby

Boarnen, noaten en referinsjes

Boarnen, noaten en/as referinsjes:

――, Hinke van der Werf finisht in top klassement Mongol Derby, yn: de Ljouwerter Krante, 16 augustus 2018, s. 3. Vogelzang, Elizabeth, Rijk op Mongoolse paardenrug, yn: de Ljouwerter Krante, 3 septimber 2018, s. 21. Foar oare boarnen en fierdere literatuer, sjoch ûnder: References, op dizze side.