Marienbaum

Marienbaum
Marije-Himelfearttsjerke
Flagge	Wapen
Polityk
Lân	Dútslân
Dielsteat	Noardryn-Westfalen
Kreis	Wesel
Sifers
Ynwennertal	1941 (1996)
Oerflak	16,26 km²
Befolkingstichtens	119 ynw./km²
Hichte	20 m boppe seenivo
Oar
Tiidsône	UTC+1
Simmertiid	UTC+2
Koördinaten	51° 41' N 6° 22' E
Webside	Side Marienbaum

Marienbaum is in beafeartsplak yn de gemeente Xanten, Dútslân. Marienbaum leit likernôch sân kilometer noardwestlik fan de stêd Xanten oan de wei nei Kalkar en hat ûngefear 2.000 ynwenners. It plak is ien fan de âldste beafeartsplakken yn it Nederryn-gebiet en alle jierren bringe noch altiten likernôch 15.000 pylgers in besite oan de tsjerke, dêr't it mirakuleuze Marije-byld stiet.

Skiednis

It is bekend dat al sûnt de 11e iuw der bewenning west hat op it plak fan it hjoeddeiske Marienbaum. Yn dy tiid waard troch de buorskippen yn de omkriten in tsjerke stifte yn it hjoeddeiske stedsdiel Vynen. Ek Marienbaum (doe bekend as Broechem) wurke mei oan de bou fan dy tsjerke. Yn 1419 waard yn Broechem it "Hûs Balken" boud.

Yn de 15e iuw wurdt it plak in beafeartssintrum, nei't in sike skieppehoeder yn de kroan fan in trepfoarmige ikebeam in byld fan de Jongfaam Marije fûn en dêrnei better waard. Op it plak, dy't de namme "An gen Trappenboom" krige, waard in jier of wat letter in kapel boud. Yn 1460 stifte Marije fan Boergonje dêr in dûbelkleaster neffens de oarder fan Birgitta fan Sweden. De kapel waard tusken 1712 en 1714 ôfbrutsen en ferfongen troch de hjoeddeiske Marije-Himelfeartstsjerke. It kleaster waard mei de ynfiering fan de sekularisaasje yn 1802 ôfbrutsen, mar de tsjerke bleau stean en tsjinne tenei as parochytsjerke. Yn dy tiid hie Marienbaum by in folkstelling 365 ynwenners.

By bombardeminten op 27 en 28 febrewaris 1945 gyng 40% fan de bebouwing fan Marienbaum ferlern.

Sûnt 1 july 1969 waard Marienbaum by de stêd Xanten yndield.

Wapen

Op in blauwe eftergrûn stiet in wite ikebeam mei trije fertakkings mei 8, 7, 8 blêden en trije woartels. Oan wjerskanten fan de stamme fan de beam binne gouden leeljes oanbrocht. It wapen waard op 24 april troch de regierungspräsident fan Düsseldorf goedkard.

De leeljes symbolisearje Marije (Marien) en iik de beam (baum). De leeljes ferwize ek nei it hartochdom Kleef.

It besjen wurdich

Marije-Himelfeartstsjerke

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Dútsktalige Wikipedyside; sjoch foar de bewurkingsskiednis: de:Marienbaum Commons Wikimedia Commons  Ofbylden dy't by dit ûnderwerp hearre, binne te finen yn de kategory Marienbaum fan Wikimedia Commons.