Landerum
Landerum (Midslânsk: Janderum) is in doarp op Skylge. Landerum leit tusken Midslân en Formearum. Op 1 jannewaris 2005 hie Landerum 88 ynwenners.
It agraryske streekdoarp ûntwikkele him yn de 17e iuw op in strânwâl tusken Midslân en Hoarne yn. It bestiet út in fersprate bebouwing fan boerepleatsen en wenhuzen. Westlik is oan de kant fan Midslân op ienselde manier de buorskip Landerum ûntstien. Yn it doarp, sels, lange tiid beskôge as in buorskip, hat nea in tsjerke stien.
Pleatsen
[bewurkje seksje | boarne bewurkje]It doarp bestiet út in rige pleatsen en wenten oan beide kanten fan de haadwei. Landerum is fanâlds in boeredoarp, mei feehâlderij as grutste ynkomsteboarne. Yn 2006 hie Landerum noch fjouwer feehâlders. De measte pleatsen binne ferboud en geskikt makke foar ferhier fan apparteminten oan toeristen. It eigen type fan de Skylger buorkerij is in fariant op de langhûsbuorkerij. Mei it wendiel en de skuorre mei stâlen en heafekken ûnder in trochrinnende, net dielde kape. It wendiel – de foarein – bestie oarspronklik út in foarkeamer en in binnenkeamer mei bedsteden. Dêrefter kaam de skuorre mei stâlromte, dy‘t oan de sydkant foar de dwersreed iepen is mei in houten útbou, in saneamd ‘skúntsje’ dêr‘t de haaiweinen troch ride koenen. Ien fan de bêst bewarre boerepleatsen fan dit type stiet yn Formearum-Súd, it ‘Spylske Huus’ út 1759, sa neamd omdat yn de boppekant fan it dak troch fersakkings wat bochten sichtber binne. De foarein hat in topgevel, fersierd mei flechtings en siermitselwurk. De buorkerij is al lange tiid net mear yn bedriuw en binnenyn is de wenfunksje frijwat oanpast. Troch de lizzing, de sterke haadfoarm en de detaillearring tsjûget de restaurearre boerepleats fan it agraryske ferline fan de polders fan it eilân. Oan it Súd fan Formearum en yn Landerum steane mear frij geve 19e-iuwske boerehuzen.
Mûne
[bewurkje seksje | boarne bewurkje]It doarpsgesicht wurdt dominearre troch in nôtmûne. De mûne wie yn 1838 boud op de Dellewâl yn West, mar is yn 1876 nei Formearum oerbrocht. De bedriuwsweardige mûne hat al lange tiid in horekabestimming. It is in achtkante houten stellingmole, dutsen mei reid, en op in potdeksele ûnderbou fan hout. It wjukkekrús hat in flecht fan tweintich meter.
Ferskaat
[bewurkje seksje | boarne bewurkje]Yn Landerum sit in garaazjebedriuw en in ferkeappunt foar Skylger huning.
