Kirkoswald (Skotlân)

	Kirkoswald
	Bestjoer
Lân	Grut-Brittanje
Lânsdiel	Skotlân
Greefskip	Ayrshire
	Sifers
Ynwennertal	194 (1991)
	Oar
Stifting	Midsiuwen
Tiidsône	UTC
Simmertiid	UTC +1
Koördinaten	55°19′48″N 4°46′00″W
	Kaart
	; Lokaasje yn Skotlân.

Kirkoswald (Skotsk: Kirkossald) is in doarp yn it distrikt Carrick fan it Skotske histoaryske greefskip Ayrshire. It leit yn súdwestlik Skotlân, oan 'e kust fan 'e Skotske See, 4½ km súdwestlik fan it doarp Maybole.

Skiednis

Kirkoswald is ferneamd nei de tsjerke (kirk) dy't wijd is oan 'e hillige Oswald fan Noardumberje, dy't neffens it ferhaal op dit plak yn 'e sânde iuw de oerwinning yn in fjildslach behelle. De âlde tsjerke, út 1244, wêrfan't de doopfont noch brûkt wie by de doop fan de Skotske frijheidsstrider en kening Robert de Bruce, yn 1274, is no in ruïne op it tsjerkhôf fan de nije tsjerke. Dy waard boud yn 1777, nei in ûntwerp fan Robert Adam. Kirkoswald is ek bekend fanwegen de konneksje mei de grutte Skotsktalige dichter Robert Burns. De Brouns, de famylje fan syn mem, kamen út Kirkoswald, en sels gied er der in hoart nei skoalle, en neitiid basearre er guon fan syn gedichten op doarpelingen út Kirkoswald.

Demografy en geografy

Yn 1991 hie Kirkoswald in befolking fan 194 minsken. De lyknammige parish ("parochy") hat in oerflak fan 60,3 km², en omfiemet ek it kustdoarp Maidens, dat yn 1991 567 ynwenners hie. Ta de besjensweardichheden yn 'e himrik fan Kirkoswald hearre de kastielen fan Culzean en Thomaston en de ruïnes fan 'e Abdij fan Crossraguel en it Kastiel fan Turnberry.

Galery

Utsjoch op Kirkoswald fanôf de heide
De âlde tsjerke
It oarlochsmonumint
It grêf fan 'Kirkton Jean' (Jean Aird), ien fan 'e ferneamde personaazjes út it wurk fan Robert Burns
It arbeidershúske fan 'Souter Johnnie' (John Davidson), noch ien fan Burns syn personaazjes, dat no in monumint is
De ruïnes fan it Kastiel fan Turnberry
Utsjoch op it doarp Maidens
Utsjoch op Mochrum Hill