Jane Lindskold

Ut Wikipedy
Jane Lindskold
skriuwer
persoanlike bysûnderheden
echte namme Jane M. Lindskold
nasjonaliteit Amerikaansk
berne 15 septimber 1962
berteplak Washington, D.C.
etnisiteit Sweedsk
Italjaansk
wurk
taal Ingelsk
sjenre fantasy, SF
bekendste
  wurk(en)
Firekeeper Saga
Land of Smoke and Sacrifice-rige
útjouwer Tor Books
jierren aktyf 1992 – no
offisjele webside
www.janelindskold.com

Jane Lindskold (folút: Jane M. Lindskold; Washington, D.C., 15 septimber 1962) is in Amerikaansk skriuwster fan romans en koarte ferhalen fan 'e fantasy- en science fiction-sjenres. Hja is benammen bekend wurden mei har Firekeeper Saga, in syklus fan seis romans oer in jonge frou dy't grutbrocht is troch wolven.

Libben en karriêre[bewurkje seksje | boarne bewurkje]

Lindskold waard yn 1962 berne yn it Columbia Hospital for Women yn 'e Amerikaanske haadstêd Washington, D.C. Hja wie de âldste fan fjouwer bern yn it gesin fan 'e hege amtner John E. Lindskold, waans famylje fan etnysk Sweedsk komôf wie (de oarspronklik stavering is Lindsköld), en dy syn frou, de abbekate Barbara Disalle, dy't fan ôfstamme fan Italjaanske ymmigranten. Lindskold hat twa jongere susters, Ann en Susan, en ien jongere broer, Graydon. Hja groeide op yn Washington, D.C., dêr't har heit oan it haad stie fan 'e Land and Natural Resources Division fan it Amerikaansk Ministearje fan Justysje. Letter wenne it gesin oan 'e Chesapeakebaai.

Lindskold gie nei de legere skoalle oan 'e Holy Trinity Elementary School yn 'e Washingtonske wyk Georgetown. De middelbere skoalle folge se oan 'e Immaculata Preparatory School. Hja studearre oan 'e Fordham Universiteit yn New York, dêr't hja op har seisentweintichste jierdei in doktoraat behelle yn Ingelske taal- en letterkunde mei as spesjaliteit Midsiuwske, Renêssânsistyske en moderne Britske literatuer. Tsjintwurdich wennet Lindskold yn Albuquerque, yn 'e súdwestlike steat Nij-Meksiko, mei har man, de archeolooch Jim Moore.

Under it mentorskip fan har freon, de skriuwer Roger Zelazny, sette Lindskold yn 1992 útein mei it skriuwen en publisearjen fan koarte ferhalen fan 'e fantasy- en science fiction-sjenres. Yn desimber 1994 brocht se har earste roman út, ûnder de titel Brother to Dragons, Companion to Owls, dy't troch de kritisy tige goed ûntfongen waard. Ek har Athanor-duology, besteande út 'e romans Changer (1998) en Legends Walking (1999), wêryn't saters, seemearminnen, ienhoarns en oare mytyske wêzens foarkomme, die it hiel goed.

Lindskold har bekendste wurk is lykwols de Firekeeper Saga, in syklus fan seis romans begjinnende mei Through Wolf's Eyes (2001) oer de jonge frou Firekeeper, dy't as bern as iennichste in ferwuostgjende brân oerlibbe hat yn in delsetting fan kolonisten yn 'e wyldernis fan in "Nije Wrâld" dy't sterk liket op 'e frontier fan koloniaal Amearika. Nei't se allinnich yn 'e wyldernis efterbleau, is Firekeeper troch in ridel wolven adoptearre en grutbrocht. It ferhaal begjint as in nije minsklike ekspedysje it territoarium fan 'e wolven ynkringt, en Firekeeper nei tolve jier foar it earst konfrontearre wurdt mei har eigen soartgenoaten. De ealman dy't de ekspedysje liedt, hopet de delsetting fan 'e eardere kolonisten te finen, mei't dy oanfierd waarden troch in ferballe prins. As hja ynstee inkeld Firekeeper oantreffe, wurdt hja mei weromnommen nei it hof om dêr oan 'e kening presintearre te wurden as syn mooglike pakesizzer. Firekeeper ûntdekt dan dat der minder ferskil is tusken in wolveridel en in keninklik hof as dat men op it earste each tinke soe.

Yn 2014 sette Lindskold útein mei in nije rige, Artemis Awakening, oer in planeet dy't oarspronklik ûntwurpen is as in plezieroard foar minsken. Nei it ynstoarten fan 'e ynterplanetêre minsklike beskaving troch in ferwuostgjende oarloch, is de namme Artemis in oar wurd foar in lusthof, in soarte Hof fan Eden, wurden, mar nimmen dy't leaut dat de planeet echt bestiet. As wittenskipper Griffin Dane wit út te puzeljen wêr't Artemis wêze moat, liedt syn werûntdekking fan 'e planeet lykwols ta ûnferwachtse gefolgen.

Wurk[bewurkje seksje | boarne bewurkje]

romans
  • 1994 – Brother to Dragons, Companion to Owls
  • 1995 – Marks of Our Brothers
  • 1995 – The Pipes of Orpheus
  • 1996 – Smoke and Mirrors
  • 1997 – When the Gods are Silent
  • 1997 – Donnerjack (mei Roger Zelazny)
  • Athanor-duology
    • 1998 – Changer
    • 1999 – Legends Walking
  • 1999 – Lord Demon (mei Roger Zelazny)
  • Firekeeper Saga
    • 2001 – Through Wolf's Eyes
    • 2002 – Wolf's Head, Wolf's Heart
    • 2003 – The Dragon of Despair
    • 2004 – Wolf Captured
    • 2006 – Wolf Hunting
    • 2007 – Wolf's Blood
    • 2019 – Wolf's Search
    • 2020 – Wolf's Soul
  • 2004 – The Buried Pyramid
  • 2005 – Child of a Rainless Year
  • The Land of Smoke and Sacrifice-rige (ek bekend as de Breaking the Wall-searje)
    • 2008 – Thirteen Orphans
    • 2009 – Nine Gates
    • 2010 – Five Odd Honors
  • Star Kingdom-searje
    • 2011 – A Beautiful Friendship (net fan Lindskild, mar fan David Weber allinnich)
    • 2012 – Fire Season (mei David Weber)
    • 2013 – Treecat Wars (mei David Weber)
    • 2022 – A New Clan (mei David Weber)
  • Artemis Awakening-rige
    • 2014 – Artemis Awakening
    • 2015 – Artemis Invaded
  • 2018 – Asphodel
  • Over Where-rige
    • 2022 – Library of the Sapphire Wind
    • 2022 – Aurora Borealis Bridge
    • 2023 – House of Rough Diamonds
novelles
  • de Captain Ah-Lee-rige (allinnich as e-boek útbrocht)
    • 2011 – Endpoint Insurance
    • 2011 – Here to There
    • 2011 – Star Messenger
    • 2011 – Winner Take Trouble
koarte ferhalen
  • 1992 – Good Boy
  • 1995 – Dark Lady
  • 1995 – Domino's Tale
  • 1995 – Kangaroo Straight
  • 1995 – Relief
  • 1995 – The Seventh Martial Art
  • 1995 – Teapot
  • 1996 – Noh Cat Afternoon (yn Catfantastic IV)
  • 1996 – Child of the Night
  • 1996 – A Dreaming of Dead Poets
  • 1996 – Web-Surfing Past Lives
  • 1997 – Hell's Mark
  • 1997 – Small Heroes
  • 1998 – Auspicious Stars
  • 1998 – Winner Takes Trouble
  • 1999 – The Queen's Gambit (yn World of Honor)
  • 1999 – The Beanstalk Incident
  • 1999 – Out of Hot Water
  • 2000 – The Big Lie
  • 2000 – Endpoint Insurance
  • 2000 – On the Edge of Sleep
  • 2000 – Ruins of the Past
  • 2000 – Sacrifice
  • 2001 – The Road to Stony Creek (yn The Blue and the Gray Undercover)
  • 2003 – Promised Land (yn The Service of the Sword)
  • 2011 – Ruthless (yn Fire Forged)
non-fiksje
  • 1989 – Chronomaster: The Official Strategy Guide (spulhânlieding)
  • 1993 – Roger Zelazny (beheinde biografy en beskriuwing fan wurk)
  • 2014 – Wanderings on Writing (essay's)

Prizen en nominaasjes[bewurkje seksje | boarne bewurkje]

Jier Priis Resultaat Kategory Foar
1995 Locus Award nominearre bêste roman Brother to Dragons, Companion to Owls
1999 Locus Award nominearre bêste roman Changer

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.