Geoffrey Chaucer

Ut Wikipedy
Gean nei: navigaasje, sykje
Chaucer en syn wapenskyld, anonym portret, 17e ieu.

Geoffrey Chaucer (Londen, sawat 1343 - dêre, 1400) wurdt beskôge as de 'heit fan de Ingelske literatuer' en wie skepper fan de meast priizge dichtwurken út de wrâldliteratuer. Hy wie net allinne in útsûnderlik bejeftige auteur en dichter, mar hie it ek drok as soldaat, hofling, diplomaat en amtner en ferfolle in ferkaat oan iepenbiere funksjes. Yn dy karriêre wie er de fertrouling en beskermeling fan trije opienfolgjende keningen, nammentlik Eduard III (1312-1377), Richard II (1367-1400) en Hindrik IV (1367-1413). Dochs fûn Chaucer de tiid om tûzenen fersregels te skriuwen dy't no noch hieltiten troch literatuerleafhawwers bot wurdearre wurde. Sa liet er sjen dat it Ingelsk út syn tiid (ek wol Middelingelsk neamd) likegoed brûkt wurde koe yn de poëzij as it Frânsk of it Latyn, wat him dy titel fan 'heit fan de Ingelske literatuer' besoarge. Hoewol't er in soad skreaun hat, wurdt er it meast priizge om syn ûnôfwurke ramtferhaal The Canterbury Tales, dat yn it Frysk oerset waard as De Canterbury Ferhalen troch Klaas Hoekstra.

Chaucer syn wurk hat in grut ferskaat oan ûnderwerpen, sjenre en stilen. Hy beljochtet it minslik stribjen nei in sinfol bestean op in soad wizen. Yn syn wurk kombinearret er humor mei earnst en relativearringsfermogen by de behanneling fan wichtige filosofyske fragen. Chaucer is in dichter fan de leafde, dy't er beskriuwt fan gleon troubrek oant spirituele ienheid mei God. Hy jout in wiidweidich oersjoch fan de swakheden en healwizens, mar ek op de edelmoedigens fan de minskheid.

Gronology fan de wichtichste wurken[bewurkje seksje | edit source]

Akademisy hawwe in gronology fan Chaucer syn wurken ûntwikkele dêr't in rûme konsensus, hoewol gjin algemiene unanimiteit oer bestiet.

  • The Book of the Duchess (1369-1372)
  • Saint Cecelia (tusken 1372 en 1380) - it ferhaal fan The Second Nun's Tale
  • The House of Fame (1378-1380)
  • Anelida and Arcite (tusken 1372 en 1380)
  • Parliament of Fowls (1380-1382)
  • Boece (1380-1387)
  • Troilus and Criseyde (1382-1386)
  • Palamoun and Arcite (1380-1387) - it ferhaal fan The Knight's Tale
  • The Legend of Good Women - guon fan de legindes kinne fan in eardere datum wêze, en de prolooch waard letter op 'e nij besjoen
  • * A Treatise on the Astrolabe (1391-1392, mei taheakkingen yn 1393 of letter)
  • The Canterbury Tales
    • (1388-1392) - General Prologue en de earste ferhalen
    • (1392-1395) - it grutste part, wêrûnder nei alle gedachten de saneamde Marriage Group
    • (1396-1400) - de lêste ferhalen, wêrûnder nei alle gedachten The Nun's Priest's Tale, The Canon's Yeoman's Tale (hoewol't in part fan dat lêste ferhaal wierskynlik al earder skreaun wie) en it ûnôfmakke The Parson's Tale


William Blake, The Canterbury Pilgrims, kopergravuere drukt op papier (sawat 1820-23).
William Blake, The Canterbury Pilgrims, kopergravuere drukt op papier (sawat 1820-23).