Blaumies

blaumies
taksonomy
ryk	dieren (Animalia)
stamme	rêchstringdieren (Chordata)
klasse	fûgels (Aves)
skift	moskeftigen (Passeriformes)
famylje	miesfûgels (Paridae)
skaai	blaumiezen (Cyanistes)
soarte
Cyanistes caeruleus
	Linnaeus, 1758
	IUCN-status:
ferspriedingsgebiet

De blaumies (Cyanistes caeruleus) is in 11 sm grutte sjongfûgel út de famylje fan 'e miesfûgels (Paridae). De blaumies komt in protte foar yn Jeropa en Aazje.

Oare Fryske nammen

De blaumies wurdt yn it Frysk ek wol beneamd as Blaukopke, Blaumûtske, Blausyske as Kûgelsyske.

Foarkommen

De blaumies is goed te werkennen, foaral oan syn blauwe krún. Fierder hat er wite wangen mei in swarte eachstreep. De fûgel hat in giele búk en in grienige rêch.

Iten

De blaumies yt sied en ynsekten.

Fuortplanting

Lykas de measte miezen is de blaumies in hoalebrieder. It wyfke leit 7-12 aaien dy't se allinnich yn sa'n 2 wiken útbriedt. De jongen wurde dêrnei noch 15-20 dagen troch beide âlden yn har nêst fuorre foardat se útfleane.

Molke

Blaumiezen binne tige nijsgjirrich en leare maklik wat nijs oan. It is bygelyks bekend fan blaumiezen dat se fan molkeflessen de doppen stikken makken om by de rjemme op 'e molke te kommen. Dit keunstke waard foar it earst opmurken yn Southampton yn Grut-Brittanje om 1920 hinne. De blaumiezen joegen dit keunstje troch oan soartgenoaten en yn 1947 waard it in hiel Grut-Brittanje sjoen en ek by miezen yn Nederlân, Sweden en Denemark. Om't de molke tsjintwurdich net mear troch de molkboer by de doar set wurde, is de fûgel dit ferleard.

Taksonomy

De blaumies is fan âlds part fan it skaai Parus. Troch nije ûntwikkelings binne der ornitologen (benammen Amerikanen) dy't de blaumies yn in apart skaai pleatse, nammentlik Cyanistes. De binomiale namme wurdt dan Cyanistes caeruleus.

Status

De populaasje en it ferspriedingsgebiet fan 'e blaumies binne grut. Oannommen wurdt dat de wrâldpopulaasje stabyl is. De IUCN klassifisearret de soarte dêrfandinne as net bedrige op 'e Reade List.

Sjoch ek

List fan fûgels

Ofbylden dy't by dit ûnderwerp hearre, binne te finen yn de kategory Blaumies fan Wikimedia Commons.