Poughkeepsie (New York)

	Poughkeepsie
	Lokaasje Poughkeepsie (read) yn Dutchess County (lofts); rjochts de lokaasje fan Dutchess County yn de Steat New York
	Bestjoer
Lân	Feriene Steaten
steat	New York
county	Dutchess
	Sifers
Ynwennertal	32.736 (2010)
Oerflak	14,81 km² (3,3 km² lân, de rest wetter)
Befolkingsticht.	2.461,4 / km² (2010)
Hichte	50 m
	Oar
Stifting	1687 (1799 doarp, 1854 stêd)
Tiidsône	UTC-5
Simmertiid	UTC-4
	Offisjele webside
	cityofpoughkeepsie

Poughkeepsie, offisjeel de City of Poughkeepsie, is in stêd yn de Amearikaanske steat New York. De stêd is it bestjoerlik sintrum fan Dutchess County. De stêd Poughkeepsie moat net betize wurde mei de town (plattelânsgemeente) yn Dutchess County mei deselde namme. Poughkeepsie leit oan eastlike kant fan de Hudson healwei tusken New York City en Albany.

Skiednis

De namme stamt út de taal fan de Wappinger en betsjut safolle as "it mei reid dutsen ûnderkommen by it lytse wetter", dat ferwiisde nei in lytse boarne dy't yn de Hudson útkomt súdlik fan de hjoeddeiske binnenstêd fan it plak.

Poughkeepsie hie net te lijen fan de Amearikaanske Unôfhinklikheidskriich en soe fuort nei dy tiid New York's twadde haadstêd wurde.

Nei de oankeap fan it gebiet fan de yndianen setten Nederlanners harren yn de 17e iuw nei wenjen op it plak. It gyng de delsetting goed en yn 1720 waard der in herfoarme tsjerke boud.

Eartiids foarme de ferwurking fan walfisken in wichtige boarne fan ynkommen. Letter droegen de skipfeart, papiermûnen en bierbrouwerijen by oan de ekonomy fan de stêd. Hjoeddedei is IBM in grutte wurkjouwer.

Om't it plak net fier fan New York City leit en de omjouwing fan Poughkeepsie in oantreklik lânskip biedt, lieten rike famyljes lykas de Astors en de Vanderbilts dêr harren bûtenferbliuwen bouwe.

De grutte brêgen Mid-Hudson Bridge en de Walkway over the Hudson (in eardere spoarbrêge) behearskje it stedsbyld.